Manish Sisodia pawh 'fake' case in man a la ni ve thuai ang : Delhi CM

Delhi chief minister Arvind Kejriwal chuan a deputy chief minister Manish Sisodia pawh Delhi health minister Satyendar Jain angin 'fake' case-in man a la ni ve thuai ang, tiin nimin khan a sawi.

Thawhṭanni khan Enforce­ment Directorate chuan money laundering case-ah Delhi Health Minister Jain hi an man a ni.

Nimina Delhi-a media briefing a neihah Arvind Kejriwal chuan, " Thla eng emaw zat liamtaah khan thu rintlak tak ka dawng a, Saytendar Jain chu fake case-ah man a ni dawn tih an sawi a ni. Hemi te hnen aṭang bawk hian Manish Sisodia pawh fake case-ah bawk man a ni leh thuai dawn tih ka hre leh a ni," a ti.

Sisodia chu 'father of education movement in Delhi' tia sawiin, Kerjiwal chuan India ram independent hnua education minister ṭha ber tiin a sawi. Sorkar school-a zirlai naupangte dinhmun chawi kan a, an hmasawnna turin theihtawp a chhuah a ni, a ti. "Delhi-ah chauh ni lo, ram pumah naupangten sorkar school-a zirna ṭha tak an dawn theihna turin beiseina a siamsak a ni," tiin a sawi.

Central-a BJP kaihhruai sorkar chu Sisodia leh Jain-ten Delhi-a education leh health sector lama an hnathawk ṭha tak takte dan beh an tum niin Kejriwal chuan a puh a ni. Hetianga minister hnathawk ṭha tak man an ni chu ram tan pawha channa a nih thu a sawi a ni.