State panga assembly inthlan result puang ; State pahnih-ah sorkarna siam thei la hriat loh

State panga-a assembly inthlan result chu kar kalta Inrinni khan puan a ni a, BJP-in state pahnih-ah sor­karna siam thei turin hnehna an chang a, Congress-in state pakhatah hnehna an chang a, state pahnihah sor­karna siam thei tura party mala chak an awm lo thung.

February 4 - March 8 chhung khan state panga - Uttar Pradesh, Punjab, Uttarakhand, Goa leh Manipur-ahte assembly inthlan hi neih a ni. Uttar Pradesh leh Uttarakhand-ahte BJP-in hnehna an chang a, Punjab-ah Congress sorkar a ding thar dawn a, Goa leh Manipur-ah sorkar siam thei tur hi a la chiang lo a, ṭangrual sorkar a din a ngai dawn a ni.

Uttar Pradesh
Assembly seat 403 awmna, Uttar Pradesh inthlanah rorellai Samajwadi Party leh Congress party an thawk dun a, an che chhe hle. Party pahnih ṭangdun hian seat 54 chiah an la pha. Inthlan hmain Samajwadi Party chhungah buaina lian tak a awm a, party pawh an phel dawn hialin an lang hman a, hei hian inthlanah nghawng a nei lian hle nia ngaih a ni.

UP inthlanah hian BJP chu beisei phak bakin an che ṭha a, seat 324 an la pha a ni. Hetianga seat tam hi UP-ah hian party malin a la la pha ngai lo. Kum 1991 inthlanah khan, UP leh Uttarakhand ṭhendarh an la nih hmain Kalyan Singh kaihhruaina hnuaiah BJP chuan assembly seat 425 aṭangin seat 221 an lo la tawh a ni. Mayawati-i party, Bahujan Samaj Party (BSP) chuan seat 19 chauh ala pha bawk.

Samajwadi Party hruaitu leh Chief Minister A­khilesh Yadav-a chuan an chak loh a pawm thu sawiin, a nihna aṭangin banna a thehluh nghal a, hetih lai hian BSP hotu Mayawati chuan Electronic Voting Machines (EVM) tihchingpen a nih thu sawiin, hmun tam takah BJP candidate chauh vote theiha siam a ni, a ti.

UP-ah hian BJP chuan party malin seat 324 an la a, SP-in seat 47 leh a thawhpui, Congress party-in seat 7 an la a, party dangin seat 6 an la bawk.

Punjab
Punjab-ah rorellai, Shiromani Akali Dal leh BJP ṭangdunte hnehin Congress party-in sorkar thar a siam dawn.

Assembly seat 117 awmna Punjab assembly inthlanah hian Congress party chuan seat hmun thuma ṭhena hmun hnih an la pha a, bial 77-ah hnehna a chang. Congress hruaitu hlun, kum 75 mi Amarinder Singh chu chief minister a ni leh dawn a ni. Rorellai SAD-BJP ṭangdun hian seat 18 chauh an la pha a, SAD hian seat 15-ah hnehna changin, BJP hian seat thum chiah an la a ni.

Punjab inthlan dawna thawm nei lian tak, Aam Aadmi Party (AAP) chuan beisei an phak lo. AAP hian seat 100 vel an la pha dawn niin insawi mah se, vote chhiar a nih hnuah seat 20-ah chauh hnehna an chang pha a ni. AAP thawhpui Lok Insaaf Party chuan seat hnih an la.

Chief Minister Parkash Singh Badal-a kaihhruai SAD-BJP ṭangrual sorkar a minister ni lai 10-in hnehna an chang zo lo. Chief minister ṭum nga lo ni tawh, Parkash Singh Badal chuan an chak loh an pawm thu sawiin, nimin khan banna a thehlut. Kum 89 mi, Badal hi ramchhunga chief minister ni lai zinga upa ber a ni.

Uttarakhand
Uttarakhand-ah rorellai Congress party hnehin BJP chuan sorkar thar a siam dawn.

BJP hian assembly seat 70 zinga seat 57 zetah hnehna an chang a, Congress party chuan seat 11 chiah an la pha a ni. BJP hi kum 16 chhunga assembly inthlana party mala seat la tam thei ber a ni.

BJP thupuangtu, Munna Singh Chauhan chuan Chief Minister Harish Rawat-a kaihhruai chu eirukna lamah hminghliauna a neih mipuiten Congress sorkar chu paihthlak an duh a, Modi-a thli a tleh nasa hle a ni, a ti. Congress MLA 11 zet chu CM Rawat-a laka an hel avangin BJP-ah a inlet a, an zinga pahnih tih loh chu inthlanah hian BJP candidate-in an ding vek a ni.

Uttarakhand Pradesh Congress Committee president Kishore Upadhyay pawh a tling zo lo a, ani bakah hian cabinet minister S S Negi, Dinesh Aggarwal, Mantri Prasad Naithani, Dinesh Dhanai, Harish Chandra Durgapal leh Navprabhat-te pawh an chak zo lo bawk.

Goa
Assembly seat 40 awmna, Goa-ah chuan party mala sorkarna siam thei an awm lo.

Congress party chu seat la hnem ber niin seat 17-a hnehna a chang a, BJP chu bial 13-ah a chak. Maharashtrawadi Gomantak Party chua seat thum a la a, Goa Forward Party in seat thum, NCP-in seat khat an la bawk.

Goa-ah hian sorkarna siam turin member 20 neih phak a ngai dawn a, party mala sorkar siam thei an awm loh avangin ṭangrual sorkar siam tumin political party-te hian thawhho dan an dap mek a ni. Congress party hian seat ngah ber mah se, party tenau dangte hian BJP thlawp an tum zawk nia sawi a nih avangin BJP kaihhruai sorkar a ding zawk mai thei nia sawi a ni. Goa chief minister atan hian Defence Minister Manohar Parrikar dah tura ngenna a awm a, hei hi central-a BJP hruaituten an ngaihtuah ang.

Manipur
Manipur-ah pawh party mala sorkarna siam thei an awm lo a, Congress leh BJP chuan sorkarna siam tumin party dangte thawhpui dan kawng an zawng mek a ni. Rorel lai Congress party chuan seat 60 awm zinga seat 28 an la a, BJP chuan seat 21 lain, National People’s Party (seat 4), Naga People’s Front (NPF) (seat 4), Lok Janshakti Party (seat 1), All India Trinamool Congress (seat 1) leh Independent (seat 1) an la ve bawk.