Sorkar laipuiin IGST Rs vbc 27,000 la pe chhuak lo : Amit Mitra

West Bengal chief minister Mamata Banerjee-i principal chief advisor, Amit Mitra chuan sorkar laipui chuan state-te hnena Integrated Goods and Services Tax (IGST) a pek tur, Rs vbc 27,000 chu ala pe chhuak lo niin a sawi.

West Bengal BJP hotu, Sukanta Majumdar-a'n sorkar laipuiin GST a pek chhuah vek tawh vangin, state sorkar pawh chuan fuel-a tax a lakte a tihniam ve tur a ni tia sawi chu chhangin, Mitra chuan, "BJP state president hian thil awm dan dik tak hi a hriat ve a ngai a ni. Sorkar laipui hian state-te hnenah GST pek tur Rs vbc 27,000 a nei a ni," a ti.

Sorkar laipuiin sum pek tur a la neihte hi state-te hnena a pek chhuah chuan economy leh demand lam pawhin hma sawnin, sorkar laipui macroeconomic policy dik lo vanga supply chain tluchhia pawh siamṭhat a ni thei ang, tiin a sawi. Sorkar laipui chuan state ho hnena sum pek tur a la neihte pe tla thuai turin a phut.