Hri kai thar 4,000 chuang awm belh leh

India ramah Ningani khan Covid-19 hri hri kai thar 4,000 an chuang leh a, hei hi thla thum dawn hnua ni khata hri kai hmuh chhuahin 4,000 an tlin vawi khatna a ni.

Ningani khan hri kai thar mi 4,041 hmuh belh leh niin, ram pumah Covid-19 hri kai hmuh chhuah tawh hi mi 4,31,68,585 an awm tawh. Hri kai mek, active case chu 21,177-ah an pung chho leh a ni.

Ni khata hri kai hmuh thar, daily positivity rate hi 0.95% niin, weekly positive rate 0.73% a ni bawk.

Hripui vanga thi mi 10 awm belh lehin, India rama Covid-19 hri a len aṭanga he hripui thihpui hi nimin zing dar 7 thleng khan mi 5,24,651 an awm tawh. Hri kai aṭanga thihpui zat, fatality rate hi 1.22% a ni.

Covid-19 vaccine pek chhuah hna pawh kalpui chhunzawm zel a ni a, nimin thleng khan vaccine hi dose vaibelchhe 193.83 pek a ni tawh.

Maharashtra deputy chief minister Ajit Pwar chuan an state-ah Covid-19 hri kai an pun chhoh leh mek thu leh, an pun belh zel a nih chuan face mask hmanna tur siam a nih leh tur thu a sawi. Maharashtra-ah hian June 1 khan hri kai thar 1,081 awmin kumin February 24 hnua ni khatah hri kai hmuh chhuah an tam ber ni a ni. An state-a hri kai hmuh chhuah tawh hi 78,88,167 tling tawhin, heng zinga 1,47,860 chuan an thihpui tawh a ni. Pawar chuan hri darh leh tur vengin state sorkar chuan theihtawpin hma a lak zel thu a sawi a, "Hri kai hi an pun belh zel a nih chuan face mask vuah leh vek tura thupek siam a ngai leh dawn a ni," a ti.