Defence Minister Parrikar a bang ; Goa CM atan lakluh a ni dawn

Defence Minister Manohar Parrikar chu Goa chief minister atan dah a nih dawn avangin union minister a nihna aṭangin a bang.

Goa assembly inthlan neih zawh takah party mala sorkarna siam thei an awm lo a, assembly seat 40 awmah Congress party chuan seat la hnem berin seat 17 an nei a, BJP-in seat 13 lain, Maharashtrawadi Gomantak Party (MGP), Goa Forward Party (GFP) leh independent candidate-te’n seat thum ṭheuh an la a, National Congress Party-in seat khat an la bawk.

Congress party chu seat neih hnem ber ni mah se, party dangten BJP thawhpui an tum avangin BJP kaihhruai sorkar a ding zawk dawn a ni. MGP leh GFP hian Manohar Parrikar hi CM atana dah a nih dawn chuan BJP hi thlawp an remti a, hei hi central lama BJP hruaituten an remtih hnuah Parrikar hi CM atana dah an remti tlang ta a ni.

Manohar Parrikar chuan Goa chief minister a nih theih nan nimin khan Prime Minister Office-ah defence minister a nihna aṭanga banna a thehlut a, Goa Goernor Mridula Sina chuan ni 15 chhungin sorkar siam turin thlawptu a ngah tawk tih fiah turin a tibawk.

Parrikar hi vawiinah Goa CM atan hian lakluh a ni dawn a, a rual hian a cabinet minister turte pawh lak luh nghal an ni ang. Parrikar chuan minister lakluh tur zat hi an ngaihtuah mek tih nimin khan a sawi.