Gujarat-in bawng humhalhna dan khauh zawk siam dawn

Gujarat Chief Minister Vijay Rupani chuan an state chhungah bawng humhalhna dan khauh zawk siam a ni dawn tih a sawi a, he dan tharah hian bawng talhna leh a sa zawrhnaa inhnamhnawihte chu damchhung tang tura hrem theih an ni ang.

CM chuan he thu hi Junagadh disrict-a Vanthali khuaa vantlang inkhawm­ah a sawichhuak a, BJP sorkar chuan kum 2011 khan bawng humhalhna dan a lo siam tawh thu a sawi. Rupani chuan bawng humhalhna dan an neih mek chu khauh zawka siam an tum tih sawiin, karleha assembly budget session neih turah bill pawh pharh an tum tih a sawi.

Gujarat chief minister-a Narendra Modi-a a awm lai, kum 2011 khan state sorkar chuan bawng talh, a sa zawrh leh phurh khual khap burna dan hi a la lo siam tawh a, he dan siam a nih hnu hian bawng talhnaa inhnamhnawihte chu Gujarat Animal Preservation (Amendment) Act hnuaiah hrem ṭhin an ni. He dan hnuaiah hian bawng talh leh a sa zawrhnaa inhnamhnawihte chu Rs 50,000 chawitir leh, kum sarih thleng lung-in tantir theih an ni.

Mahse CM Rupani chuan hremna na zawk pek a nih theih nan dan hman mek hi siamṭhat a rawt a,”Bill pharh turah hian bawng talhna leh a sa phurh kualnaa inhnamhnawihte chu dam chhung tang tura hrem theih an ni ang a, an motor hmante pawh pekkir tawh lo tura mansak an ni bawk ang”, a ti.