Goa : SC-ah Congress party zualko

Goa Governor Mridula Sinha-i’n Goa assembly inthlan neih zawh taka party mala seat la hnem ber, Congress party aia BJP zawk sorkar siam tura a sawm chungchangah Congress party chu Thawhṭanni zan khan Supreme Court-ah an zualko.

Supreme Court chuan Congress party-in Governor Sinha thiltih dan chu ram danpui kalh a ni tia petition a thehluh chu ngaihtuah nghal a remti a ni.

Congress party petition thehluh­ah hian dan anga party mala seat ngah ber sorkar siam tura sawm lo a, Governor chuan a thuneihna dik lo taka hmangin BJP a sawm hmasa zawk niin an sawi. Sorkar laipui leh Governor thiltih dan chu democracy kalphung palzutna a ni, an ti.

Chief Justice of India JS Khehar chuan Goa Congress Legislature Party hruaitu, Chandrakant Kavlekar-a petition thehluh ngaihtuah tur hian Special Bench din a remti a ni.

Goa assembly seat 40 awmah hian Congess party chuan seat 17 lain, BJP hian seat 13 an la a, party pahnihte hian party malin sorkarna an siam thei lo a, midang an thawhpui a ngai a ni. Mahse BJP hian party dang, Maharashtrawadi Gomantak Party (MGP), Goa Forward Party (GFP) leh Independent MLA pathumte thlawpna an nei theih dawn a, sorkar an siam thei dawn niin an sawi a ni.

Hetih lai hian Goa chief minister thar atan defence minister atanga bang ta, Manohar Parrikar chu nimin vek khan lakluh a ni. Supreme court chuan Congress petition thehluh hi ngaihtuah remti mah se, CM atana Parrihar lakluh tur erawh chu a dang lo a, mahse March 16-ah sorkar thar chuan thlawptu a ngah tawk em tih fiah turin a ti.

Congress party chuan March 16-a sorkar fiah hunah BJP kaih­hruai sorkar chuan fiahna a paltlang thei dawn lo niin an sawi a, Parrikar chu ni hnih chhung chauh CM a ni then dawn a ni, an ti. Congress vice president Rahul Gandhi chuan, BJP hian Goa-ah sorkar siam an duh avangin sum pawh an chelek nasa hle niin a sawi a, governor thuneihna pawh dik lo takin an hman tir niin a sawi.