Kum 2019 inthlanah Modi-a mipuite duh ber la ni dawn
Prime Minister Narendra Modi chu kum 2019 Lok Sabha inthlanpui neih hunah mipuite duh ber a la ni dawn niin, US expert-te’n an sawi.
Expert ṭhenkhat chuan kumina state panga-a assembly inthlan result aṭangin, kum 2019 inthlanpuiah Modi-a kaihhruai BJP chuan hma an la hruai chhunzawm zel dawn tih a tilang niin an tarlang.
George Washington University-a Political Science and International Affairs Assistant Professor Adam Ziegfeld chuan, assembly inthlan result aṭang chuan kum 2014 Lok Sabha inthlan nen boruak ala danglam lo nia a lan thu a sawi a, a bikin state lian Uttar Pradesh-ah BJP a che ṭha hle a, a hmaa BSP leh Samajwadi Party-te’n hnehna an lo channa aia nasain an chak a ni, a ti.
Uttar Pradesh inthan result aṭang chuan kum 2019 Lok Sabha inthlanpui neih turah pawh Modi chu hnehna chang tur leh, mipuite duh ber tur a la ni tih a chiang hle niin, American Enterprise Institute-a resident fellow Sadanand Dhume chuan a sawi.
Hetih lai hian Georgetown University-a Walsh School of Foreign Service Professor Irfan Nooruddin chuan 2019 inthlanpuiah BJP chuan party mala majority a neih phak a rin loh thu sawiin, BJP kaihhruai ṭangrual sorkar erawh ala din leh a ring tih a sawi bawk.