UP CM thar tur la tichiang lo

Uttar Pradesh-a BJP sorkar thar ding turah chief minister tur thlan fel a la ni lo a, vawiin-ah Lucknow-ah MLA thlan tharte nen meeting neiin BJP president Amit Shah chuan CM thar tur hi a thlang dawn a ni.

UP CM thar tura hming sawilan zingah hian Union Home Minister Rajnath Singh pawh sawilan a ni a, mahse Singh chuan Rajnath Singh-a hming an sawiri ve chu thil ṭullo leh sawt lo tak niin a sawi. Kum 65 mi, Singh hi UP chief minister a lo ni tawh a, UP-a BJP hruaitu senior berte zing ami a ni.

Assembly inthlan neih zawh takah khan BJP chu hneh taka thlan tlin an ni a, kum 1977 hnua UP-a party mala seat la hnem ber a ni. Assembly seat 403 awmah BJP hian seat 325 an la pha a ni.

CM atana hming sawilante zingah State BJP president ni lai, Keshav Prasadh Maurya chu a langsar hle. Maurya hi Most Backward Caste (MBC) niin, BJP chakna kawnga mi pawimawh tak a ni a, state BJP president atana ruat a nih hnuah hruaitu ṭha tak a ni tih pawh a pholang a ni. Minister of State for Railways and Telecom nilai, Manoj Sinha pawh sawi rik a ni bawk. Sinha hi Benares Hindu University aṭanga M.Tech zirchhuak a ni a, mipuite ngaitnat a hlawh hle a, a bikin thingtlang mipuite nen inpawhna ṭha tak an nei a ni. 

Amah hi Bhumihar Brahmin hnam a ni. Lucknow Mayor Dinesh Sharma hming pawh an lam ri bawk a, Brahmin hruaitu niin Atal Bihari Vajpayee nena inpawh tak a ni. Lucknow University-ah professor a ni bawk a, RSS nen inzawmna nghet an nei. Prime Minister hlui Lal Bahadur Shastri-a tupa, BJP national secretary nilai Siddarh Nath Singh pawh CM ni thei tura sawi zing­ah a tel bawk. Singh hi Kayasth hnam a ni a, politics lama buaina chinfel kawnga tawnhriat nei ṭha tak a ni.