Punjab CM atan Amarinder Singh la lut

Congress Party hruaitu, Captain Amarinder Singh chu nimin khan Punjab Chief Minister 26-na atan rinawmna thu tiamtira lakluh a ni.

Governor VP Singh Badnore chuan Chandigarh-a Raj Bhawan-ah CM thar hi rinawmna thu tiamtirin a la lut a, a rual hian cabinet minister pakua-te pawh lakluh an ni. Punjab hian minister 18 chin a nei thei a ni.

CM lakluh inkhawm hi Congress vice president Rahul Gandhi leh prime minister hlui Manmohan Singh-te’n an hmanpui. Party hruaitu dang Sachin Pilot, Raj Babbar, Ambika Soni, Pawan Bandal leh Ajay Maken-te pawh an tel. Prime Minister Narandra Modi-a pawhin CM thar hi lawmpuina a hlan bawk.

Assembly inthlan result puan ni, March 11 khan Amrinder-a kum 75 tlin champha phak a ni. Seat 117 awmna, Punjab assembly inthlanah hian Congress party chuan seat 77 a la pha a, party malin sorkarna a siam thei a ni. Captain Amarinder Singh hi CM a nih ṭum hnihna tur a ni a, kum 2002 - 2007 chhung khan CM a lo ni tawh bawk.

Amarinder Singh :
Punjah Chief Minister thar Amarinder Singh hi kum 1942, March thlaa piang a ni a, a pa hi Patiala lal hnuhnung ber a ni. National Defence Academy leh Indian Military Academy aṭanga military training chhuak a ni. Kum 1963-ah Indian Army zawmin, 1965-a Indo-Pakistan indo lai pawh khan Sikh regiment-ah a tel a ni.

Prime Minister hlui, Rajiv Gandhi-a nen school kal lai aṭanga inṭhianṭha an ni a, Congresss party a zawm hnuah kum 1980 khan Lok Sabha inthlanah a chuh a, thlan tlin a ni. Mahse kum 1984 khan Golden Temple-a Operation Blue Star kalpui a nih avanga lungawi loin Congress Party a chhuahsan a, SAD a zawm. Kum 1992 ah SAD aṭanga inlachhuakin, Shiromani Akali Dal (Panthic) a din a, a party din hi kum 1997 khan Congress party nen an inchhunfin leh a ni.

Kum 2014 Lok Sabha inthlanah khan Amritsar-ah chuhin, BJP hruaitu Arun Jaitley chu vote nuai khat chuangin a hneh. Mahse Supreme Court-in Sutlej Yamuna Link (SYL) canal agreement chu ram danpui kalh tia a rel avangin lungawi loin MP a nihna aṭang hian a bang a ni.

Kum 2015, November 27 khan Punjab Congress president atan ruat a ni a, kumina assembly inthlanah khan a kaihhruaina hnuaiah Congress party chuan inthlan hi hma­chhawnin, hneh taka thlan tlin an ni ta a ni. Amarinder Singh hi Punjab state-ah a larin zah a kai hle. Politics bakah literature huangah pawh hriat a hlaw a, Sikh chanchin bakah indo chanchin lehkhabu eng emaw zat a ziak tawh a ni.