Goa CM Parrikar-a’n fiahna paltlang

Goa Chief Minister Manohar Parrikar-a kaihhruai sorkar chuan nimin khan House-ah fiahna a paltlang.

BJP kaihhruai sorkar chuan thlawptu MLA 22 a nei a, Congress party MLA 16-in an thlawp lo thung. Sorkar fiahnaah hian MLA pakhat a tello a, Nationalist Congress Party MLA Churchill Alemao chuan sorkar thlawp lamah a vote a ni.

A ṭum li-na atana Goa CM atana lakluh, Manohar Parrikar chuan Congress hruaitu, Digvijaya Singh chu bei leh nghalin, Digvijaya-a chuan sorkar siam thei turin member an nei niin sawi mah se, floor test aṭang chuan thlawptu an neih zat chu chiang takin a lang a ni, a ti. Party malah Congress aiin MLA nei tlem zawh mah se, sorkar an siam theih nan party dang MLA-te sumin an lei nia puhna chu thu dik lo a nih thu a sawi a, MLA-te chuan an mahnih duh thu ngeiin a kaihhruai sorkar chu an thlawp tih a sawi. Ṭangrual sorkar an siam a, thutlukna pawh ṭang­rual party-te’n an siam zel dawn tih a sawi bawk.

CM Mannikar hian a minister turte ruat nghal mah se, chanvo pek an la ni lo. Parrikar chuan Parliament budget session neih mek a zawh hun, April thlaah minister-te chanpual tur hi sem a tum niin a sawi.

Hetih lai hian Congress MLA ṭhenkhat chu member tam ber ni chung­a sorkar siam thei loa an awm chungchangah, party hruaitute chu hma la chak tawk lohah puhin a lung­awi lo hle. Nimina Parrikar-a kaihhruai sorkarin fiahna a paltlang hnuah, Congress MLA lungawi lo zinga pakhat Vishawajit Rane chuan an party aṭang­a a ban thu a puang. Rane hi Goa chief minister hlui Pratapsingh Rane-a fapa a ni a, MLA atana lakluh a nih hnuah House aṭangin a chhuak nghal a ni.