BJP-in party thupuangtu Nupur Sharma an suspend

Bharatiya Janata Party (BJP) chuan an party thupuangtu Nupur Sharma leh Naveen Kumar-te chu inhnialna chawk chhuak thei zawnga thu an sawi avangin party member an nihna aṭangin nimin khan an suspend.

TV news debate an neihah Nupur Sharma hian zawlnei Mohammed-a chungchang mawi lo takin a sawi a, he a thusawi hian Muslim mite rilru a ti na hle a, Uttar Pradesh-a Kanpur-ah buaina a chhuah phah nia sawi a ni. Buaina chhuak vang hian Zirtawpni liam takhan police-te chuan mi 29 an man a ni.

Party thupuangtu, Nupur Sharma thusawi chungchangah BJP pawh inthiarfihlim nghalin, nimin khan party general secretary Arun Singh chuan thuchhuah a siam a, 'BJP chuan sakhaw inhmusitna leh inngaihnep sakna hi na takin a dem a, chutiang ngaihdan neite chu a thlawp ngai lo. BJP chuan sakhaw tin a zah em em vek a ni," tiin a sawi. India ram danpui pawhin mitin chu an sakhaw duh ber zawm turin dikna chanvo a pe vek a ni, a ti.

Mumbai Police-te chuan Muslim organisation Raza Academy-in complaint an thehluh hnuah Inrinni khan Nupur Sharma lakah hian thubuai an ziaklut a ni.