UP leh Uttarakhand sorkar thar la lut dawn

Uttarkhand sorkar thar chu vawiin hian lakluh a ni dawn a, naktukah Uttar Pradesh sorkar thar lak luh a ni bawk ang. State pahnihah hian BJP sorkar a ding ve ve dawn a, mahse nimin tlai thleng khan chief minister turte puan an la ni lo.

Uttarakhand leh Uttar Pradesh-ah hian BJP hi hneh taka thlan tlin an ni a, Uttarakhand-a assembly seat 70 awmah BJP hian seat 57 an la a, seat 403 awmna Uttar Pradesh-ah seat 312 lai, a thawhpui party-in seat 13 a la tel bawk.

Prime Minister Narendra Modi leh BJP President Amit Shah bakah union minister eng emaw zatin state pahnih sorkar thar lakluh inkhawm hi an hmanpui dawn a ni.

Uttarakhand BJP MLA thlan tharte chu nizan khan inhmu­khawm­in chief minister thar tur hi an thlang a ni. Legislature party hruaitu thar thlanna neihpui tur hian BJP president chuan central observer pahnih - Saroj Pandey leh Narendra Tomar a ruat.

Pathianni-a tlai dar 5-ah Uttar Pradesh sorkar thar lakluh a ni dawn bawk a, nimin tlai thleng khan UP CM tur hi puan a la ni lo. Sorkar thar lakluh inkhawm hi state khawpui, Lucknow-a Smriti Upwan-ah neih a ni ang.

UP BJP MLA 312 chu vawiin hian inhmukhawmin, legislature party hruaitu tur an thlang ang. Chief minister tura hming sawilan zingah hian Union Home Minister Rajnath Singh, Minister of State for Telecom Manoj Sinah leh state BJP president Keshav Prasad Maurya-te an tel.