Taj Mahal venhimna tikhauh

India rama hmun hmingthang, Taj Mahal chu website pakhat ṭanga beih tumna a awm nia hriat a nih avangin nimin khan venhimna tihkhauh a ni.

Official sawi danin, website pakhatah Taj Mahal thlalak leh, a bula firfiak pakhat ralthuam kenga a ding lai thlalak dah a ni, he thlalak hi tualchhung chanchinbu lamah pawh tihchhuah a ni. He wesbite-a thlalak dah chungchang hi police leh intelligence agency-te hriattir an nih hnuah, police team-te chuan Taj Mahal chhehvel hi uluk zawkin an dap zui nghal a ni.

World heritage monument, Taj Mahal hi kumtinin tlawhtu mi maktaduai ruk chuang an awm ṭhin. Taj Mahal chhunglam ven hna hi Central Industrial Security Force-te kutah dah a ni a, a pawn lam venhim hna hi Uttar Pradesh Police leh Provincial Armed Constabulary-in an thawk thung.