Kuwait, Qatar leh Saudi Arabia ramin Prophet chungchanga BJP thupuangtu thusawi an dem
Central-a BJP kaihhruai sorkar chuan an party thupuangtu, Nupur Sharma leh Delhi-a an party media head Naveen Kumar Jindal-ten prophet Mohammed an sawichhiat avangin Gulf ramte sawisel an tawh belh zel.
Kuwait, Qatar leh Saudi Arabia foreign ministry-te chuan BJP thupuangtuin prophet Muhammad a sawichhiat chungchanga an demna thu official statement an siam a, ngaihdam dil turin an phut bawk.
BJP chuan a thusawi avangin Nupur Sharma hi party member a nihna aṭangin an suspend a, Jindal hi an hnawtchhuak bawk. Party thuchhuah pawh siamin, sakhaw hrang hrangte an zah thu leh, eng sakhua pawh sawichhiat leh hmusitna chu an dem thu an sawi a ni.
Pakistan chuan BJP hruaitute thusawi avang hian an rama Indian hargé d’affaires chu koin, an lungawi loh thu a hrilh. Pakistan foreign office chuan BJP hruaitute thusawi hi an dem thu leh, khawvel hmun hrang hranga Muslim-te rilru an tihnat thu a sawi a ni. BJP sorkarin official-te chunga action an la mai lo chu an dem thu leh, action an lak dan pawh a nep an tih thu an sawi bawk. Hemi hma hian Pakistan prime minister Shehbaz Sharif chuan Narendra Modi kaihhruaina hnuaiha India ramah sakhaw zalenna rahbeh a nih thu leh, Muslim-ten tihduhdah an tawrh thu a lo sawi fo tawh tih sawiin, khawvelin India rama thil thleng hi an dem a ṭul thu a lo sawi tawh bawk.
Saudi Arabia foreign affairs ministry chuan nimin khan thuchhuah siamin, BJP-in Sharma a suspend chu lawmawm an tih thu a sawi. Hemi rual hian India rama rorellai, BJP thupuangtuin prophet Muhammad sawichhia a, Islam sakhaw zuitute rilru a ti na chu an dem hle tih an sawi nghal bawk a ni.
Qatar foreign affairs ministry chuan Pathianni khan an rama India ambassador chu koin, India rama rorellai party official-in prophet Muhammad chungchang a sawi dan chu an dem hle tih hrilhin, India chu khawvela Muslim te hnena ngaihdam dil tura an phut thu an hrilh.
Kuwait-ah pawh foreign ministry chuan Indian ambassador hnenah BJP thupuangtu thusawi an dem thu an hrilh. BJP-in an suspend chu ṭha an tih rualin, a thusawi avang hian ngaihdam dil tura an phut thu an sawi nghal bawk.
Congress-in BJP hruaitu 2 man an phut
BJP hruaitu pahnihte thusawi chungchang hi eptu party hrang hrang pawhin an dem thu an sawi a, Congress party chuan an pahnih hian man tura an phut thu an sawi.
BJP policy chuan ram pumah inhuatna a thlen a, khawvel mithmuhah India hming tihchhiat a ni tih Congress chuan an sawi a, hetianga inhuatna chawk chhuaktute hi man nghal an ni tur a ni, an ti. BJP thiltihsual vangin India ramin ngaihdam a dil angai lo a, rorellai party president hian ngaihdam chu a dil zawk tur a ni, an ti bawk.
Nupur Sharma leh Naveen Jindal Kumar-te hian prophet Muhammad chungchanga an thusawi avang hian ngaihdam dilna an tichhuak tawh a ni.
Critics-te chuan Sharma leh Jindal-te thusawi hian India rama sakhaw inthliarna rawn hluar chho zel a tilang chiang hle niin an sawi a, kum 2014-a BJP-in sorkarna an chan aṭangin India ramah Muslim-te beihna leh huatna lam hawi thusawi pawh a hluar chho hle a ni , an ti.