Senior citizen tan ‘Rashtriya Vayoshri Yojna’ scheme siam

Sorkar laipui chuan BPL chhungkuaa kum upa zawk ten a thlawna beng dar, wheelchair leh hmanraw dangte an dawn theihna turin ‘Rashtriya Vayoshri Yojna’ scheme a siam a, he scheme atan hian cheng vaibelchhe 477 ruahman a ni.

March 25 khian Union Social Justice and Empowerment Minister Thaawarchand Gehlot leh Information leh Broadcasting Minister M Venkaiah Naidu-te chuan Andhra Pradesh-a Nellore district-a free camp buatsaihah he scheme thar hi an tlangzarh dawn a ni. March 26 hian Madhya Pradsh-a Ujjain district-ah free camp hi buatsaih a ni bawk ang.

Ministry of Social Justice and Empowerment senior official chuan he scheme-in a tum ber chu chhungkaw dinhmun chhe zawka kum upa lamten an mamawh hmanruate a thlawna an dawn theihna tura chhawmdawlna pek a nih thu a sawi. Sorkar laipui chuan free camp pahnihah mi 2,000 hnenah heng hmanruate hi a thlawna sem turin a ruahman a ni, a ti.

Official chuan free camp hi kum khat chhungin state tina district pahnih-ah ṭheuh buatsaih a nih tur thu a sawi a, nikum December thla khan minister chuan state tin chief minister-te hnenah district thlan bikte hi hriattir turin alo hrilh tawh niin a sawi. Hmanrua an sem turte hi quality ṭha, Bureau of Indian Standards-in a pawmpui te an ni dawn tih a sawi bawk.

Rashtriya Vayoshri Yojna scheme hnuaia hamṭhatna dawng turte hi kum 60 an tling tur a ni a, BLP chhungkua ami an ni bawk tur a ni. Hmanrua an sem turte hi - tiang, wheelchair, tripod, tarmit, bengdar leh an mamawh thildangte a ni.

Kum 2011 Census-ah khan ram chhungah kum 60 chunglam hi mi vaibelchhe 10.38 an awm a, an zinga 5.2% chu upa lam natna hrang hrang nei an ni. Kum 2026 ah chuan senior citizen hi vaibelchhe 17.3 vel an tlin chhoh rin a nih thu official chuan a sawi.