Amnesty-in UP CM a thusawite sut turin phut

Human rights group, Amnesty International chuan Uttar Pradesh Chief Minister thar, Yogi Adityanath chu tun hma lama sakhaw inhuatna chawk tho zawnga thu a lo sawi tawhte sut leh turin an phut.

Hindu kulmuk, Hindu sakhaw chawisan duhtu leh Hindu puithiam atana zirtir chhuah, Yogi Adityanath hi sakhaw dang bei leh enhrang zawnga thu a sawi fo avangin CM atana dah a ni pawh hian sawizui a hlawh hle. Criminal case eng emaw zat a nei mek bawk a, a thubuai neih zingah hian buaina chhawk chhuak leh tualthah tuma puhna pawh a tel.

Amnesty International India executive director, Aakar Patel chuan Adityanath hi Uttar Pradesh-a politican lar tak, sakhaw dang, a bikin Muslim te huatna ṭawngkam chhakchhuak fo a nih thu a sawi. Mahse tunah chuan India ram chhunga mihring tamna ber state a ni tawh a, amah leh a party chuan a dinhmun pawimawh zia leh, a hmaa a lo thil sawi leh tum dante chu sorkar policy a ni lo tih an lantir a ngai a ni, a ti. Hei vang hian inhuatna chawk tho thei thu alo sawi tawhte sut turin an phut tih a sawi a, hei hi a nih loh chuan human right palzutna thlen thei turin phalna pe ang a ni dawn a ni, a ti.

Aditynath hian India chu Hindu rama din a duh thu leh, Hindu sakhaw chawisan a tum thute a lo sawi fo tawh a ni. Kum 2007 khan Gorakhpur-ah tualchhung buaina chawk chhuaka puh a nih avangin ni 15 chhung man a lo ni tawh a ni. Hei bakah hian midangte himna tiderthawnga puhna te, dan loa punkhawmna buatsaihate puh a lo ni tawh bawk.

UP CM thar hi a ministry semfel dan tur ngaihtuahin Delhi-ah a kal a, Prime Minister Narendra Modi leh BJP president Amit Shah-te nen an ngaihtuah ho dawn a ni. CM leh de­puty CM Maurya-te chuan home ministry chan an inchuh a, Deputy CM dang Dinesh Sharma chuan finance ministry chan a hauh bawk. Hetih lai hian CM hian ministry pawimawh dang, education leh health te chan ngei a duh nia sawi a ni.

Hindu puithiam aṭanga politician-a inlet, Yogi Adityanath hian CM atana lakluh a nih hnuah in­thlan dana BJP thutiamte tihhlawh­tlin tumin hma a la ṭan a, loneitute loan ba ngaihdamna tur leh, dan loa ran talhna in awmte kharna thupekte a siam tawh a ni. Sorkar hnathawk leh police hotute pawh a siksawi dawn nia sawi a ni bawk.