Ram temple buaina Court pawn lamah chingfel turin ti

Supreme Court chuan Ayodhya-a Ram temple sak tum chungchanga buaina chu court pawn lamah chingfel turin a ti.

Ram temple sak tumna thubuai hi kum ruk zet tihkhawtlai a ni tawh a, Supreme Court chuan an buaina hi inbiakna hmanga chinfel dan ngaihtuah zawkturin a ti a, inbiakna a hlawhchham chauhin court chu a inrawlh dawn niin a sawi.

Chief Justice JS Khehar chuan BJP senior leader Subramanian Swamy-a petition thehluh an ngaihtuahnaah, he buaina hi sakhaw thil a nih avangin inbiakna hmanga sawifel tum hmasak a ngai tih a sawi. Mahse Swamy chuan sakhaw pahnihte inbiakna neihtir chu thil harsa tak a nih thu leh, court chu a inrawlh a ngai, niin a sawi thung.

Kum 2010 khan court chuan Allahabad High court-in Ayadhya-a central dome chu Lord Ram pianna hmun a ni a, Hindu-te pawhi an sakhaw hmun pawimawh an sa ve thei ang tia a lo rel tawhna chu a lo dansak tawh a ni.