UP CM-in bawng tawlh luh/chhuah a khap

Uttar Pradesh Chief Minister thar Yogi Adityanath chuan nimin khan bawng tawlh luh leh chhuah khapna thupek a tichhuak a, state chhunga ran talhna-in kharna tur thupek a tichhuak bawk.

Hindu puithiam aṭanga politician-a inlet, Hindu chawisan duh a bawng humhalh duhtu, sakhaw dang ngaithei lo zawnga thu chhakchhuak fo, Yogi Adityanath hi CM atana dah chungchang hian sawizui a hlawh hle. Eptu party-te pawhin an sawisel nasa hle a ni.

CM Adityanath kaihhruai BJP sorkar hi Pathianni khan lakluh a ni. Thawhlehni khan CM thar thupek angin thuneitute chuan Kamalgadaha-a sa talhna -in chu an khar a ni. Mahse he hmun hi dan phalna nei loa siam nia sawi a ni a, kum 2012 pawh khan khar a lo ni tawh a ni. Pollution Control Borad, municipal authority leh district leh police official-te chuan ran talhna-in kharsakin, he ina bawng panga awm chu an laksak bawk. Thawhlehni zan khan Hathras district-a sa zawrhna dawr eng emaw zat chu bawng humhalhtu intiten an halsak bawk.

Adityanath chuan police hotu hnenah dan loa ran talhna in awmte chu kharsak vek an nih theih nana ruahmanna siam turin a ti a, hei bakah hian bawng humhalhna tur dan khauh tak siam turin a ti bawk. Yogi Adityanath chuan district hrang hranga police hotute chu bawng tawlhruknaa inhnamhnawihte chu dim lo turin a ti bawk a ni.

State Minister Sidarth Nath Singh chuan CM thupek siam chu thil thar a ni lo tih sawiin, an party manifesto-ah pawh dan kalha ran talhna in dinte chu khar vek an lo tiam tawh sa niin a sawi. State chhungah chuan dan kalha thiltih reng reng an remti dawn lo tih a sawi.

CM thupek vek hian UP Police-te chuan Anti-Romeo Squad an din a, hei hi hmeichhiate zahawmna humhimna tura ti an nih thu an sawi. District hrang hranga police station-ah Anti-Romeo squad hi siam a ni dawn a, member 3-4 zel an awm ang. Mahse mihring tamna hmunah chuan squad khatah hian mi pali aia tam an awm thei dawn a ni.

Anti-Romeo squad-te hi zirna-in bulah leh vantlang punkhawmna hmunah te duty tirin, hmeichhiaten chhaih an tawh ṭhinte an veng dawn a ni. School leh college bakah bazar hmunahte an duh hunah kalin an endik thei dawn bawk a ni.

Thawhlehni khan Meerut-ah anti-romeo squad hian hmeichhe school leh college pawn lama mipa rual awmkhawmte chu manin thu an zawtfiah nghal a ni. State police hotu Javeed Ahmed chuan CM thupek angin he squad hi hmeichhiate himna atan, chhaih leh khawih an tawh ṭhin venna atana din a nih thu a sawi. Police station tinah mipui punkhawmna hmun hrang hrang, bazar hmun leh college, school leh coaching centre-te chu hmeichhia, a bikin tleirawlte an himna tura hma la vek turin hriattir an ni.

CM Adityanath chuan sorkar office hrang hrangah gutkha leh paan masala leh sahdah lakluh a khap bawk. CM hian sorkar office-a kuhva eina hnuhma mawi lo tak takte a hmuh avangin a lungawi lo hle a, office chhunga lakluh leh ei khapna thupek hi a siam nghal bawk a ni.

Sorkar thar chuan Uttar Pradesh Public Service Commission (UPPSC) exam buatsaiha thil fel tawk lo a awm nia sawi a nih vangin exam leh interview neih turte pawh thupek a awm leh hma chuan titawp vek turin thupek a tichhuak.