Hna thawk duh lo chu bang mai rawh se : Bombay HC

Bombay High Court chuan Maharashtra sorkar damdawi-ina thawk, resident doctor-te’n nawrh huaihawt a, an duty duh lo chu thil zahthlak tak a ni tih a sawi.

Sorkar damdawi-ina doctor thawk lai 4,000 chuang zet chu damlo chhugnten an thawhpui doctor-te kut an thlak avanga lungawi loin ni hnih an nuar tawh a, security ṭha zawk pe turin sorkar an phut a ni.

Doctor-te nawrh huai­hawt vang hian damdawi-in hrang hrangten harsatna an tawk a, damlo tam tak chu enkawlna mumal dawng loin an awm phah a ni. Hei vang hian social activist Afak Mandaviya chuan Bombay High Court-ah public interest litigation (PIL) a thehlut. PIL thehluh hi Chief Justice Manjula Chellur leh Justice GS Kulkarni awmna division bench chuan a ngaihtuah a ni.

Chief Justice chuan, doctor-te chu hna an thawk duh lo a nih chuan bang mai turin a ti a, hetianga damlote enkawl duh loa doctor-te’n nawrh an huaihawt chu mak a tih thu a sawi.

Maharashtra Association of Resident Doctors (MARD) chuan nawrh chu an pawl huaihawt a nih loh thu sawiin, doctor nuar mek­te chu an hna thawk chhunzawm turin a ngen.