AIADMK symbol changtu zawk awm lo

Tamil Nadu-a rorellai, AIADMK-a O Panneerselvam leh VK Sasikala-i lampang pawl pahnihten by-election neih tura an party symbol hman an inchuhna chu Election Commission chuan a dan sak a, pawl pahnihte hi symbol hrang ve ve hmang turin a hriattir. Hemi hnu hian AIADMK pawl pahnih angin an awm zui nghal a ni.

AIADMK hotu hlui leh Chief Minister hlui, J Jayalalithaa-i bial hlui, Chennai-a RK Nagar-ah by-election neih a ni dawn a, he inthlanah hian Panneerselvam leh Sasikala lamṭangte hian a hrana chuh an tum a, party symbol hmangtu zawk nih an inchuh zui a ni.

Election Commission chuan party symbol, hnah pahnih lawm awmna an inchuh chungchang hi a ngaihtuah hnuah, an hman a remti lo ve ve a ni. Pawl pahnihte chu symbol thar hmang turin a hriattir a ni.

Commission thutlukna puan a ni hnuah, nimin khan hruaitu pahnihte hian an pawl hming hi an phuah zui nghal a ni. Panneerselvam-a pawl hian an pawl hming atan hian Puratchi Thalaivi AIADMK tih an vuah a, Sasikala-i lamṭangte hian Amma AIADMK an inti thung.

‘Puratchi Thalaivi’ hi Tamil ṭawngin revolutionary leader tihna a ni a, Jayalalithaa-i sawina atan an hmang ṭhin. Amma hi Jaya-i an sawina a ni bawk. Pawl pahnihte hming awmzia hi thuhmun reng a ni.

Panneerselvam-a pawlte hian symbol atan eletric ban lem an hmang dawn a, Sasikala-i lamṭangte hian lukhum lem an hmang thung ang. By-election hi April 12 hian neih a ni dawn a, April 15-ah vote chhiarin result puan nghal a ni ang.