Modi-a’n ramchhunga tunnel thui ber a hawng dawn

Prime Minister Narendra Modi-a chuan ramchhunga leiverh, road tunnel thui ber, Jammu-Srinagar National Highway chu April 2 khian a hawng dawn. He tunnel siam hian Jammu leh Srinagar inkar kawng chu km 30 zetin a tihtawi phah a ni.

Union Minister of State Jitendra Singh chuan, PM-in Chenai-Nashri tunnel a hawn tur thu hi a sawi a, tunnel hawn hnu hian vantlang inkhawmah thu a sawi dawn niin a sawi.

Km 9.2-a thui, twin-tube tunnel hi Himalayan chuanhnuai lam tlangdunga Jammu-Srinagar National Highway-a four-lane project hnuaiah thawh a ni a, kum 2011, May 3 khan hna thawhṭan a ni. Km 286-a thui four-lane project atan hian cheng vaibelchhe 3,720 ruahman a ni.

Tunnel hi meter 1,200-a sangah siam a ni a, tunlai hmanraw changkang nena thuam a ni. Tunnel-ah hian ventilation, fire control, signal, commnication leh electrical system ṭha tak dah a ni. Jammu and Sringar inkara motor tlan nana hun hman chu darkar hnih leh a chanve-in a tlem phah dawn a, Chennani leh Nashri inkar kawng, km 41-a thui ni ṭhin pawh km 10.9 chauh a ni tawh dawn bawk.