Al-Qaida-in India rama thihchilh bomb tihpuahah vau
BJP hruaitu pahnih, Nupur Sharma leh Naveen Kumar Jindal-ten prophet Muhammad an sawichhiatna chuan nghawng a la nei zel a, firfiak pawl al-Qaida in the Subcontinent(AQIS) chuan India rama thihchilh bomb tihpuah an inpeih reng thu an sawi.
Vauna thuchhuah an siamah, al-Qaida chuan, "Kan Prophet zahawmna leh ropuina humhim tur hian Gujarat, UP, Bombai leh Gujarat-ahte thihchilh bomb tipuak turin kan inpeih reng a ni," a ti. Prophet Muhammad-a phuba lak ngei an tum thu an sawi a ni. Midangte pawh Prophet tana bei let a, thih pawh inhuam tura fuih an tum thute pawh an sawilang bawk.
BJP-in kaihhruaina thar siam
Centre-a rorellai, BJP chuan an party thupuangtu, Nupur Sharma-in TV debate-a prophet Muhammad chungchanga a sawi avanga demna hrang hrang an tawh hnuah, TV debate-a party thupuangtu leh hruaitu tel tur chin chungchangah kaihhruaina thar a siam.
BJP chuan TV debate-ah hian party media cell-in a ruat bik, spokerperson leh panelist-te chauh an inlan thei dawn tih a tarlang. Party thupuangtute chu eng sakhaw mah sawichhe lo tur te, sakhaw symbol leh an rawngbawltu pawimawhte sawichhe lo tura hriattir an ni bawk.
BJP panelist-te chu debate-a inhnialna a nasat deuh pawha thinrim leh buaina chawk chhuak zawnga awm lo tur te, an ṭawngkam hman pawh fimkhur tura hrilhin, party kalphung leh duhdante chu eng kawng maha bawhchhe lo tura tih an ni.
TV-a sawihona huna an tel dawnin, spokesperson-te chu an thu sawiho tur chungchang chu uluk taka zirchiang hmasa phawt turin a ti bawk a, agenda chauh chu sawi ṭhin turin a ti.
Kanpur BJP hruaitu man
Nupur Sharma-in prophet Muhammad chungchang a sawi avanga Kanpur, Uttar Pradesh-a buaina a chhuah hnuah, twitter-a prophet sawichhiatna thu ziaktu Kanpur BJP hruaitu Harshit Srivastava chu nimin khan man a ni.
Harshit Srivastava hi BJP Youth Wingh member leh student council member a ni. Twitter-a a thu ziak pawh a paih leh tawh a ni.
Kanpur police hotu, Vijay Singh Meena chuan a thu post avangin Srivastava chungah action lain, thubuai pawh an siamsak nghal a, hemi hnu hian an man tih a sawi. "Sorkar chuan policy nghet tak a nei a, buaina chawk chhuak zawnga thiltite chungah action na takin a la zel dawn a ni," a ti.