Delhi leh NCR-ah lungalhthei hman khap

Commission for Air Quality Management (CAQM) chuan nakkum January 1 aṭangin Delhi khawpui leh National Capital Region (NCR)-ah industry, inchhung leh thil dangah lungalhthei hman a khap.

He khapna hian thermal power plant-a low-sulphur coal hman ṭhin erawh a huam tel lo thung.

Thupek a tihchhuahah, CAQM chuan lungalhthei hman khapna hi PNG infrastructure leh supply awma area-ah kumin October aṭangin hman ṭan a ni ang a, Delhi leh NCR pumah chuan nakkum January 1 aṭangin khapna hi hman a ni ang.

Delhi hi khawvela khawpui boruak bawlhhlawh ber zingah kum eng emaw zat a tel tawh. Environmental expert-te chuan Delhi leh NRC boruak bawlhhlawh chhan pakhatah lungalhthei hal khu hi a tel tih an sawi. Nikum thlasik dawn khan Delhi sorkar air pollution tihziaawmna tura a hmalaknaah cold plant panga a lo kharsak tawh a ni. CAQM chuan khawpui chhunga nitin mamawh phur ni lo, motor lian luh khapin, Delhi leh a chhehvel khawpuia in sak hna thawh pawh a tihtawp tir bawk.