Airline Association blacklist-ah Shiv Sena MP Gaikwad dah

Shiv Sena MP Ravindra Gaikwad chu Air India staff member kut a thlak avangin Airline Association-in black list-ah an dah a, an thlawhtheihnaa chuan an remti dawn tawh lo tih an sawi.

Ningani khan Ravindra Gaikwad hi Air India thlawhtheihna, flight AI852 in Pune aṭangin New Delhi a pan a, he thlawhtheihna hi chawhma dar 10:55-ah Goa kal tur a ni. Zing dar 9:35-ah New Delhi an thleng a, khualzin dangte an chhuk vek hnuah pawh Gaikwad hi a chhuk ve dawn lo a ni. MP hian business-class ticket a nei a, mahse flight AI852 hi all-economy service a ni a, hei hi a ṭhuhruai hnenah pawh hrilh hriat vek a nih thu Pune Airport Manager chuan a sawi.

Gaikwad hian AI thlawhtheihnaah hian chuan a duh tlat avangin business-class a awm loh avangin a tlarhmaah seat pek a ni. New Delhi airport an thlen hnuah MP hi darkar khat dawn thlawhtheihna aṭang hian a chhuak duh lo a, he thlawhtheihna hmanga Goa pan tum khualzin 115 chuan an nghak a ni. Staff-in MP hi chhuk tura a va ngen chuan a lo thinrim, ṭawngkam na taka lo hauin a pheikhawk-in a lo vaw zui niin Air India thupuangtu chuan a sawi. Gaikwad chuan staff hi thlawhtheihna atana nam thlak a tum a, mahse staff dang awmte an lo dang a ni.

MP Gaikwad hi Air India staff kut a thlak avang hian thubuai pahnih siamsak a ni.

Air India chuan an staff chungah Shiv Sena MP chetdanah lungawi loin, an thlawhtheihnaa chuan an phalloh, black list-ah telh a nih tu nimin khan a puang. A hnu lawkah Jet Airways, IndiGo, SpiceJet leh GoAir telna Federation of Indian Airlines (FIA) chuan MP chetdan hi ngaihtuahin, an thlawhtheihnaa chuan khap an rel ve leh a ni.

Shiv Sena president Uddhav Thackeray chuan Gaikwad hi a thiltih dan chungchangah insawifiah turin a hriattir tawh bawk.

Hetih lai hian Gaikwad chuan Civil Aviatoin Minister Ashok Gajapathi leh Lok Sabha Speaker Sumitra Mahajan-te hnenah thil thlen dan chu chhuichiang tura phutin complaint a thehlut. Gaikwad chun a thiltih avanga inchhirna a neih loh thu sawiin, Air India staff kut a thlak hnenah chuan ngaihdam dil a tum lo tih a sawi.