Maha doctor-ten chawlh lak titawp

Damlo chhungten doctor-te kut an thlak fo avanga lungawi lohna lantira nawrh huaihawt, Mumbai-a resident doctor-te chuan a huhoa chawlh an lak chu titawpin, nimin aṭang khan an duty an chhunzawm. Doctor rualte hi ni li chhung an chawl hman a ni.

Rsident doctor 4,000 chuangin nawrh an huaihawt avang hian khawpui chhunga medical service a buai phah hle a, damlo tam tak chu enkawltu mumal nei loin an awm a ni. Doctor-te hian an thawhpuite kutthlak an ni ṭhin chu an lungawi loh tih sawiin, damdawi-in hrang hrangah doctor-te himna tur ngaihtuah sak turin sorkar an phut a ni.

Ningani khan Bombay High Court chuan state chhunga sorkar damdawi-in hrang hrangah April 5 hmain security guard 500 tal dah turin sorkar leh hospital thuneitute a hriattir a ni. Hmi hnu hian Maharashtra Association of Resident Doctors (MARD) chuan doctor rualte chu an nawrh titawp turin a ngen a ni.

Court chuan damdawi-in hrang hrangah doctor-te security pek an nih dan chu hunbi neiah a enfiah ṭhin dawn tih a sawi. High court chuan thuneitute hnenah damdawi-ina damlo awmpui turin an chhungte pahnih chauh awm phalsak turin a ti bawk.

Mumbai doctor-te hian Thawhṭanni aṭang khan chawlh lain lungawi lohna an lantir a, Nilaini khan Indian Medical Association hnuaia doctor 40,000 chuang chuan nawrh huaihawt hi an lo zawm a ni.