BJP MLA-in bawng talhtute ruh tihtliahsakah vau

Uttar Pradesh-a BJP MLA Vikram Saini chuan bawng zahlo leh National song ‘Vande Mataram’ zah lote chu na taka hremah a vau.

Saini chuan kar kalta Inrinni-a Muzaffarnagar inkhawma thu a sawiah, bawng zah lohna lantir a, tihlumte chu an kut leh kete amah ngeiin a tihthliah sak ang tih a sawi a, hei bakah hian Vande Mataram sa duh lote chu a dim dawn lo tih a sawi bawk.

MLA thusawi hian sawizui a hlawhin sawisel a tawk nasa hle a, mahse Saini chuan tih dik lo a neih loh thu a sawi. A thusawi avanga thupha chawi a tum loh thu a sawi bawk. Saini hian a hma pawhin buaina chawk chhuak thei thu a lo sawi chhuak tawh a, Muzaffarnagar tual­chhung buainaa a chhuah laia a thusawi avangin thubuai siamsak a lo ni tawh bawk.

Uttar Pradesh Chief Minister atan hian Hindu puithiam, bawng humhalh duhtu Yogi Adityanath lakluh a ni a, lakluh a nih hnuah CM hian bawng humhalh chu an state leh central-a BJP sorkar tan thil paiwmawh tak a nih thu a sawi. BJP sorkar thar a din hnu hian Uttar Pradesh chhunga dan loa ran talhna hmun awm eng emaw zat chu kharsak an ni tawh bawk, a kaihhruai sorkar chuan bawng humhalhna turin kawng hrang hrangin hma a la dawn tih CM chuan a sawi.