Airport leh thlawhtheihnaa face mask vuahna tur thupek tichhuak

India ramah kar liam ta aṭang khan Covid-19 hri kai thar an pun chhoh leh avangin, Directorate General of Civil Aviation (DGCA) chuan airport leh thlawhtheihna chhungah face mask vuah leh vek turin a ti.

DGCA chuan thlawhtheihnaa passenger thuawih lo, mask vuah duh lo leh Covid-19 protocol zawm lote chu chhuah tir theih an ni ang, a ti. Dan zawm duhlo te hi sum chawitir bakah, airport-a CISF kutah hlan an ni dawn tih a sawi bawk.

Airport-a venhim hna thawktu, Central Industrial Security Force (CISF) leh police-te chu airport luhnaah mask vuah lo chu kaltlang tir lo tura hriattir an nih tih DGCA chuan a sawi a, airport zawng zawngah operator-te chuan face mask vuah vek tur leh, Covid kaihhruaina dante siam tura mipuite hriattirna chu tam zawkin an puang leh tur a ni, a ti.

Kar liam ta aṭang khan India ramah Covid-19 hri kai thar hi an pung chho leh. Nilaini khan hri kai hmuh chhuah thar mi 7,240 awmin, a hma ni aia hri kai thar punna hi 40% dawn a tling a ni. Hemi ni hian hripui vangin mi pariat an thi bawk.

Nilainia hri kai thar hmuh chhuah hi kumin March thla hnua ni khata hri kai thar hmuh chhuah an tam ber ni a ni. June thla bikah hri kai thar hi 39,400 chuang an awm tawh a, heng zinga 20,000 chuang chu tun kar bika hmuh chhuah an ni.