Plastic Straw khap rih lo turin Amul-in PM a ngen

India rama dairy group lian ber, Amul chuan sorkar laipuiah ngenna thlenin, plastic straw khap a tumna chu tikhawtlai rih tura ngenin, khap nghal mai a nih chuan ram chhunga loneitute leh bawnghnute in lamah nghawng ṭha lo a nei dawn niin a sawi.

Sorkar laipui hian July 1 aṭangin juice pack leh dairy product lam chia plastic straw hman chu khap a tum a ni. He thutlukna hian Amul bakah in tur lam siamtu, PepsiCo Inc leh Coca-Cola te a nghawng na dawn hle. Sorkar chuan heng company-te hian plastic straw an hmante chu thlak turin a ti a ni. Amul hian bawnghnute aṭanga siam in tur bawm te hi plastic straw nen hian kumtin bur tluklehdingawn tel a hralh chhuak ṭhin.

Amul chuan Prime Minister Office-ah ngenna hi thehlutin, straw an dah hian bawnghnute intu a tihtam phah a, hei vang hian plastic straw khap tumna hi kum khat tal la tikhawtlai rih turin a ngen. He khapna hi tihkhawtlai a nih chuan ram chhunga bawngvulhtu mi maktaduai 100-te rilru hahna pawh a kian phah thei dawn a ni, a ti. He ngenna thehluhah hian Managing Director RS Sodhi chuan a hming a ziak a ni.