UP-ah sa zuarten nawrh an huaihawt

Uttar Pradesh-ah Chief Minister Yogi Adityanath-a kaihhruai BJP sorkar a din hnuah state chhunga sa talhna hmun eng emaw zat kharsak a ni tawh a, hei vang hian nimin aṭang khan sa zuarte chuam tiam chin awm loin nawrh an huaihawt.

Hetih lai hian state sorkar chuan dan loa sa talhna hmunte chauh dapchhuah leh kharsak an ni tih a sawi thung. BJP thupangtu Sambit Patra chuan, state sorkar chuan dan loa sa talh­na hmun titawp tura court thupek a zawm zawk niin a sawi a, phalna nei leh dan hnuai ran talhna hmunte chu khawih tel an ni lo, a ti.

Sa zuartute chuan ran talhna hmun tam tak kharsak an nih vangin sa zawrh tur thlengin a nghawng a, hei hian mi tam tak eizawna a khawih a ni, an ti. Sa zuarte nawrh huaihawt hi sangha zuartu pawl pawhin an zawm ve dawn niin an sawi.

UP-a eptu pawl, Congress hruaitu Akhilesh Pratap Singh chuan dan loa thiltite dapchhuah hna chu an thlawp rualin, sorkar chuan beihpui a thlaknaah dawr te zawkte chauh a bitum ngam thung niin a sawi. Hei bakah hian beihpui thlak hmain sorkar chuan dan leh hrai chungchangte mipuite a hrilhhriat phawt a ngai a ni, a ti.

Senior Minister Siddarth Nath Singh chuan sorkarin sa zawrhna leh artui zawrhna dawrte khar turin thupek a siam loh thu a sawi a, dan loa sa talhna hmun chauh dap a ni, a ti. Sa talhna-in pawh licence nei chu kharsak an ni dawn lo tih a sawi.

UP Chief Minister atana Hindu puithiam Yogi Adityanath lakluh a nih hnuah CM hian cabinet meeting ko loin hmalakna tur thutlukna 50 a siam tawh a, fakna leh sawiselna thu pawh a tam hle. CM-in thupek a siam zingah hian khawlaia hmeichhiaten chhaih leh zui an tawh ṭhin vengtu tur anti-Romea squad dinna tur te, dan loa sa talhna-in kharna tur te, sorkar office chhungah pan masala ei khap leh polyethene hman khapna te, Allahabad, Meerut, Agra, Gorakhpur-a Metrol Rail project siam tur te, state chhung kawngpuia khuar awmte kumin June thla ral hma ngeia siamṭhatna turte a tel.

CM chuan state chhunga police station tina reception counter-ah hmeichhia leh mipa official dah vek tur te, police station tinah tui thianghlim lakna tur hmanrua dah te, political leader-te security ennawn te, sorkar office-a CCTV camera dahna tur thupek pawh a siam bawk.

Adityanath chuan an state-a dan leh thupek din­hmun siamṭhatna turin sorkar hnathawk liante chu rim taka thawk turin a chah a, ni khata darkar 18-20 hna thawk thei lo tur chu an hna bansan mai turin a ti. CM chuan, “State sorkar chuan sorkar scheme hrang hrang kalpuinaah inthlahdah a remti dawn lo. Officer zingah nitin darkar 18-20 chhung hnathawh inhuamte chuan an thawh chhunzawm zel thei ang a, a inhuam lo chu an bang thei ang”, tiin a sawi. CM chuan hnathawh atchilh mi a nih thu sawiin, officer-te pawh thawkrim turin a chah.