Midday meal scheme-ah zirlai a taka awm lo nuai 4.4 ziahluh an ni

Sorkar laipuiin mid-day meal scheme hmanga sorkar school-a zirlai naupangte chaw chhun a thlawna a pek ṭhinah, state pathuma school hrang hrangah zirlai a taka awm lo nuai 4.4 zet he scheme dawng zingah hian ziah luh tel a ni tih hmuhchhuah a ni.

Union human resource development (HRD) minsitry chuan tun thla aṭangin mid-day meal dawng tur zirlaite chu an Aadhaar number theh­lut tel vek turin a ti a, heta ṭang hian state pathum - Jharkhand, Manipur leh Andhra Pradesh aṭangin mid-day meal dawnga sawi zingah zirlai nuai 4.4 zet chu Aadhaar number thehluh tur awm lo an ni tih hriat a ni.

Hetih lai hian activist hrang hrang chuan HRD ministry thuchhuah hi na takin an sawisel a, Aadhaar number hi neih kim vek a la ni loh avangin ministry thupek siam avang hian zirlai zingah tam takin mid-day meal an dawn thei hloh phah niin an sawi thung.

Jharkhand state-ah hian zirlai, Aadhaar number thehluh tur awm lo nuai 2.2 zet chu school record aṭangin paih an ni a, hetihlai hian state chhunga sorkar school-a zirlai inziaklut, mi nuai 48 zinga 89% chuan Aadhaar number hi an nei tawh a ni. Manipur-ah zirlai, a taka awm lo hriatchhuah hi 1,500 an awm. Andhra Pradesh-ah pawh zirlai, mid-day meal dawnga ziah luh zinga nuai 29 chu a taka awm lo an ni bawk.

Rampumah sorkar school-a zirlai inziaklut hi vaibelchhe 13.16 an awm a, heng zingah zirlai vaibelchhe 10.03 chuan kum 2015-16 khan mid-day meal hi an dawng a ni. HRD ministry chuan zirlai lem ziahluh hmuhchhuah a nih aṭang hian mid-day meal tana sum sen tam tak an hum theih phah dawn niin a sawi.