Sorkar scheme dawng turin Aadhaar phut kher a ṭul lo : SC

Supreme Court chuan sorkarin welfare scheme a siamte dawng turin Aadhaar card a neih tel kher a phut tur a ni lo, a ti.

Apex court chuan scheme dang, bank account hawnna atan leh thil dangahte sorkarin Aadhaar number a phut kher erawh chu a dang lo tih a sawi. Finance Minister Arun Jaitley-a chuan Aadhaard card chu hun lo kal zelah identity card awmchhun a la ni thei dawn tih sawiin, Voter ID leh PAN card thlakna atan pawh hman a la ni thei tih a sawi a, chhiah pekna atante pawh neih ngei a ngai dawn tih a lo sawi tawh a ni.

Sorkar laipui chuan dri­ving licence siamna leh renew-na atan te, telephone connection tihna atante Aadhaar card chu telh ngei ngei tur a ni tih a lo sawi tawh a, sorkar school-a zirlai naupang mid-day meal dawng turte tan pawh neih a ngai tawh a ni.

Kum 2015 October thla khan Supreme Court chuan sorkar scheme hrang hranga beneficiary tan Aadhaar chu phut ngei ngei tur a ni lo tiin thupek a lo siam tawh a ni. Supreme Court thupek hi sorkar laipui chuan a bawhchhia nia court-ah an zualko a, hemi chungchang hi judge pasarih awmna bench chuan a ngaihtuah a ni. Chief Justice Jagdish Singh Khehar kaihhruai bench chuan tunah rih chuan benefiarcy te Aadhaar number phut tel kher chu tih theih a nih lo tih a sawi.