UP leh Delhi-ah lungawi lohna lantir
Prophet Muhammad sawichhetu, central-a rorellai, Bharatiya Janata Party (BJP) thupuangtu aṭanga suspend tak, Nupur Sharma leh a thawhpui, Naveen Kumar Jindal-te laka lungawi lohna lantirin nimin khan Delhi leh Uttar Pradesh-ah nawrh huaihawt a ni.
Nimina ṭawngṭaina hnu hman zawhah, Delhi-a Jama Masjid kawtah lungawi lohna hi lantirin, Nupur Sharma chu man an phut tih an sawi.
Jama Masjid-a Shahi Imam chuan nawrh huaihawt hi an hriatpui loh thu sawiin, prophet Muhammad sawichhiat a nih avanga lungawi lohna an lantir duh an ni chuan an duh angin an ti thei a, mahse thuneitu lam chuan a thlawp dawn lo tih an hrilh lawk thu a sawi a ni.
Delhi police-te chu nawrh huaihawtna, Jama Masjid-ah hian kal nghalin, pungkhawmte pawh an hnawtdarh tih an sawi.
Uttar Pradesh khawthlang lam, Saharanpur-ah pawh nimin khan nawrh huaihawtin, dawrte khar a ni. Hei bakah hian Lucknow, Kanpur leh Firozabad-ahte nawrh huaihawt a ni bawk.
Delhi leh Uttar Pradesh-a nawrh huaihawtnaah hian buaina lian tham leh tharum thawhna thleng report a awm lo.
BJP hruaitu pahnihten prophet Muhammad chungchang an sawi dan avang hian Gulf ramte an lawm lo hle a, demna thuchhuah siamin ngaihdam dil turin an phut a ni. Gulf ram hrang hrangah India thil siam boycott tura nawrna pawh a awm mek a ni.
Jammu-ah curfew puang
Nupur Sharma thusawi avanga buaina kal zelah, Jammu and Kashmir-a Chinab valley reigon-a khaw lian zualahte curfew puan a ni a, internet service pawh tihtawp a ni bawk.
Srinagar-ah pawh internet tihtawp lailawk a ni bawk.
Social media lamah prophet Muhammad sawichhetu, Nupur Sharma thusawi thlawptu an awm avangin Bhardewah-ah buaina hi a chhuak a, mosque-ah lungawi lohna an lantir zui bawk. Hemi hnu hian social media lamah inhnialna nasa zawk chhuakin, buaina pawh a punlun phah a ni.
Buaina nasa zawk chhuak tur venthawn thilah khaw eng emaw zatah curfew puan a ni a, hmun dangah pawh mi pathum aia tam punkhawmte khap a ni bawk. Police-te chuan dan bawhchhiate lakah FIR ziahluh nghal zel a nih tur thu an sawi.