Covid-19 : February hnua daily positivity rate san ber ṭum thleng

India ramah Covid-19 hri kai hmuh chhuah an pung thar chho leh zel a, Ningani khan hri kai thar 7,584 awmin, daily positivity rate hi 2.26% ah a kai leh a, February 15 hnuah a san ber ṭum a thleng leh a ni.

Ningani hian India ram pumah Covid-19 hri vanga thi mi 24 awm belh lehin, he hripui vanga thi hi nimin zing dar 8 thleng khan 5,24,747 an awm tawh.

Sorkar laipui chuan kar hnih liam ta aṭangin hri kai an pun chhoh leh avangin, Ningani khan state leh union territory hrang hrangah hri leng laka fimkhur turin a chah leh a, hri kai thar hmuh tamna bialah a tam thei ang test nei turin a ti a ni.

Union health secretary Rajesh Bhushan chuan a bikin state pali - Maharashtra, Kerala, Delhi leh Karnataka-ahte hri kai hi an pung chho leh tih a sawi a, hei vang hian hri darh zel tur venna atana khauh zawka hma la turin a ti. Nilainia hri kai hmuh chhuah zinga 81% kha heng state pali a mite hi an ni.

State/UT hrang hrang hnena lehkha a thawnah, Bhushan chuan, "Thla li liam ta chhung khan ram pumah Covid-19 case a tlahniam hle a, mahse karhnih liam ta aṭang khan hri kai hi an pung chho leh ta a ni," tiin state/UT tin te chu ṭan la thar leh turin a chah.

Mithiamte chuan hri kai thar hi pung leh mah se, hospital-a dah luh ngai erawh a pung lem lo a, hei vang hian hlauhthawn lutuk tur a awm lo tih an sawi. Hemi rual hian fimkhur erawh a ṭul hle tih an sawi thung.