India ramah Covid-19 lab 1,000 awm tawh

Indian Council of Medical Research (ICMR) chuan nimin thleng khan ram chhung hmun hrang hrangah Covid-19 sample test theihna laboratory 1000 a pawmpui tawh a, heng zinga 730 hi sorkar laboratory niin 270 chu private laboratory a ni thung.

January thlaah kha chuan India hian Covid-19 sample test theihna laboratory hi pakhat chiah a la nei a, National Institute of Virology, Pune-ah chiah a nei a ni. Mahse nimina report an tihchhuahah chuan 1,000 a tling ta a, ICMR hian nasa takin hma an lak chhunzawm reng bawk.

ICMR hian hma an sawn chak hle a, a tirah kha chuan nikhatah sample 100 chiahte ram pumah test a  ni ṭhin. Nimina an report tihchhuahah erawh chuan ni khatah sample 2,15,195 an test a, a ṭum khatna atan sample nuai hnih chuang ni khatah an test ta a ni. Hri len ṭantirh aṭang khan ram pumah sample 73,52,911 an test tawh a ni.

India hian hrileng enkawl dam kawngah leh facility lamah nasa takin hma sawn mah se hripui leng hian ziaawm lam a la pan thei chuang lo a, niminah pawh khan hri kai hmuh chhuah thar 15,968  awm lehin hri len ṭantirh aṭanga hri kai hmuh chhuah tam ber ni a thleng leh a ni.

India ramah hian coronavirus kai mi 4,56,183 an awm tawh a, enkawl dam 2,58,685 awm tawhin hri kai mek 1,83,022 an awm bawk. Hri kai enkawl dam hi darkar 24 chhungin mi 10,495 an awm a, thihpui 465 awm lehin Covid-19 vanga thi hi 14,476 an awm tawh. 

Union Home Minister Amit Shah chuan nimin khan kar leh chhung hian Delhi-ah Covid-19 kaite enkawlna turin khum 20,000 vel an dah belh dawn tih sawiin, ICU khum 250 an dah belh dawn tih a sawi bawk.

Amit Shah chuan Radha Swami Beas, Chhatarpur, Delhi-a COVID Care Centre-a khum 10,000 chuang vel chu tun kar chhung hian hman theih a ni tawh dawn tih a sawi a ni.

West Bengal-a Trinamool Congress MLA, Tamonash Ghosh (60) chu nimin khan Covid-19 hri vangin a thi. 

Ghosh hi May thla khan hri a kai tih hriat a ni a, damdawiina dah luh nghal ni mah se ṭhat lam a pan thei lo a, nimin kha he hri vang hian a thi ta a ni. Hemi hma hian Tamil Nadu-a eptu pawl, DMK hruaitu J Anbazhagan chu coronavirus vang hian a lo thi tawh bawk a ni. 

AYUSH Ministry chuan Patanjali Ayurved Ltd hnenah hriattirna pe in, Covid-19 enkawlna damdawi nia an sawi, Thawhlehnia an tlangzarh tak 'Coronil' chungchang chiang takin, a rang thei ang bera hriattir turin a ti.

Yoga Guru Baba Ramdev Patanjali Ayurved hian 'Coronil' hi Thawhlehni khan an tlangzarh a, hemi hnu lawk hian AYUSH Ministry chuan damdawi an enchhinna damdawi-in, an protocol, sample size, Institutional Ethics Committee clearance, CTRI registration leh an zirchianna data result-te hriattir turin an ti a ni. An damdawi siam chhuah hi zirchianna mumal awm lo nia ngaiin company chu advertisement pawh ti rih lo turin an hriattir. 

Uttarakhand sorkar hnuaia State Licensing Authority pawhin damdawi licence an pekna leh an pawmpuina copy an dil nghal a, an ministry chuan Patanjali Ayurved Ltd-in an enchhinna leh scientific study an neihte chu an hriatpui lo tih thuchhuah an siamah an tarlang.