Prophet Muhammad chungchang vangin buaina chhuah belh zel
BJP hruaitu hlui, Nupur Sharma-i'n prophet Muhammad a sawichhiat avanga lungawi lohna lantirin, ram chhung hmun hrang hrangah nawrh huaihawt a la ni a, hmun tam takah buaina a chhuak bawk.
Kar liam ta Zirtawpnia ṭawngṭaina hun an hman zawhah, Uttar Pradesh, Delhi, Maharashtra leh state dangah-te Muslim-ten lungawi lohna lantirin, prophet Muhammad chungchang an sawi dan avanga BJP-in hruaitu an nihna aṭanga a ban tak, Nupur Sharma leh Naveen Kumar Jindal-te chu man an phut a ni.
Union minister Anurak Thakur chuan nimin khan lungawi lohna lantirnaa tharum thawhna thleng ṭhin chu titawp tura ngenin, "Democracy ramah tharum thawhna hian hmun a nei lo. Mi tupawhin an lungawi lohna lantirna hun an nei vek a, heng buaina hi inbiakna hmanga chinfel theih reng a nih laiin, kut thawh leh mawi lo taka lo chetna tur hi a awm lo," a ti. Pawl hrang hrang hruaitute pawh boruak ṭha lo tipunlun zawnga thil ti lo turin a ti bawk.
Ranchi-ah darkar 33 internet service titawp
Jharkhand khawpui, Ranchi-ah Zirtawpnia nawrh huaihawtnaa buaina chhuak vangin mi pahnih an thi a, mi dang eng emaw zatin hliam an tuar. Hei vang hian khawpuia internet service chu darkar 33 chhung tihtawp a ni bawk.
Nimin khan dawr leh sumdawnna hmunte pawh la khar vek niin, Ranchi khawpuiah hian venhim hna thawk turin police 22,500 vel dah an ni.
Jharkhand police thupuangtu, Amol V Homkar chuan buaina chhuak kaihhnawihah hian FIR pariat ziahluh niin, police team lamin an chhui chiang mek a, thu zawhfiah turin mi eng emaw zat hren an ni tih a sawi. Police station area 12-ah CrPC section 144 puan a ni bawk.
Buaina chawkchhuaktua puh in bulldozer hmangin tichhia
Uttar Pradesh-a Prayagraj-a BJP hruaitu hlui, Nupur Sharma laka lungawi lohna lantirna leh buaina chhuaka police-ten a bultumtu bera an puh, Javed Mohammad aka Javed Pum chenna in chu nimin khan bullzoder hmanga tihchhiatsak a ni.
Prayagraj Development Authority (PDA) chuan Mohammad-a hnenah demlition notice pein, nimin chawhma dar 11 hmaa a in chu chhuahsan turin an hriattir a, hemi hnu hian a in tichhe tur hian bulldozer hi tirh a ni. Mohammad-a chenna in hi dan kalha sak niin PDA chuan an sawi.
Javed Mohammad hi Welfare Party of India activist a ni a, buaina chhuak kaihhnawihah hian Inrinni khan man a ni tawh a ni. A fanu, student activist Afreen Fatima chuan a nu leh a nau pawh police-ten an man tel niin a sawi.
PM a inrawlh a hun tawh : Chidambaram
BJP hruaituten Prophet Muhammad chungchang an sawiah leh, he thil avanga ram chhung hmun hrang hranga buaina chhuak mekah prime minister chu a inrawlh thuai a hun tawh tih Congess party hruaitu P Chidambaram chuan a sawi.
News agency PTI in a kawmnaah, Congress MP Chidambaram chuan, "BJP hruaitu pahnihten tawng huatthlala tak chungchanga Prime Minister chu a ṭawng chhuah a, hma a lak a hun tawh a ni. Eptu party hrang hrang te, civil society leader te, writer, scholar leh mipui nawlpuiten Islam huatna thu sawi ṭhinte titawp tura an nawr reng laia sorkar laipuiin a beng a chhu nghawng tlat hi a pawi hle a ni.
Ram chhung hmun tam takah lungawi lohna lantir a ni mek chuan sakhaw zalenna chungchang chu sorkar laipuiin a ngaihsak tawk tak tak lo tih a tilang a ni, a ti bawk.