India leh Pakistan-in embassy staff in hnawh chhuah sak an tum
Sorkar laipui chuan New Delhi-a Pakistan embassy-a hnathawk awm chu a zahve hnawh chhuah a tum tih a sawi. Pakistan chuan India hi a tihdan ang chiahin a chhang ve nghal dawn tih a sawi.
Ram inhal tak pahnihte hi a hma pawhin enthlatua inpuh chungchangah an palaite an lo inhnawhchhuah sak tawh ṭhin.
June 16 khan Pakistan khawpui Islamabad-ah traffic accident-a hit and run case chungchangah India embassy-a thawk Indian official pahnih chu Pakistan chuan rinhlelh thilah a hreng a, thu an zawhfiah hnuah chhuah leh an ni. An pahnih hian Thawhṭanni khan India-ah an rawn haw a, hren an nih chunga tihduhdah an nih dante an sawi a ni.
Hei vang hian foreign ministry chuan Pakistan thiltih dan hi demin, ram pahnihten palaite inenkawlsak dan chungchanga inremna an lo siam tawh bawhchhiaah an puh. New Delhi-a Pakistan embassy-a hnathawk awm zat tihtlem a nih theihna atan thawktu 50% chu hnawh chhuah a tum ta a ni.