Loneitute'n Amit Shah rawtna an hnawl

Sorkar laipuiin farm law a siam thar duh lohna lantira nawrh huaihawt mek, Punjab loneitu pawlte chuan union  home minister Amit Shah-a'n an thil phut chungchanga inbiakna neih a rawtna an hnawl. 

Amit Shah hian New Delhi-a nawrh huaihawtna tur hmuna an siamah awm phawt a, chumi hnua inbiakna neih hi a rawt a ni. Mahse loneitute chuan hei hi duh loin, sorkar chuan thudelhkilh engmah siam loin, rilru inhawng takin inbiakna a neihpui zawk tur a ni, an ti. 

Loneitute hi Delhi-Haryan boder, Singhu leh Tikri border point-ah ni li chhung chu farm law duh lohna lantirin an awm tawh a, Amit Shah chuan Burari ground-ah insawn phawt tur leh, chumi hnuah sorkar laipui chuan inbiakna a neihpui tur thu a sawi a ni. 

Ram chhung hmun hrang hrang aṭangin loneitute chuan farm law duh lohna lantir turin Delhi hi an pan a, hun eng emaw chen Delhi police-ten luh phal loa an dan hnuah sorkar laipui chuan Burari ground-ah nawrh huaihawt hi a phalsak a ni. An zinga eng emaw zat chu Tikri border kaltlang hian Burari ground-a kal turin Delhi an lut a, mahse tam tak chuan khawpui laili laiah lungawi lohna lantir phutin an la awm thung. 

Delhi pana kal tam ber hi Punjab leh Haryana aṭanga kal an ni.