Parliament-ah GST Bill sawiho

Sorkar laipuiin July 1 aṭanga hman ṭan tuma a buaipui mek, Goods and Services Tax (GST) Bill chu nimin khan Parliament-ah sawiho a ni.

Union Finance Minister Arun Jailtey-a chuan Lok Sabha rorel inkhawmah inang tlanga chhiah lakna tur kalpuina tura pawimawh bill pali a pu lut a, GST chu Indian legislature-a tawnhriat dangdai tak tak tur a nih thu a sawi. Nimina Lok Sabha inkhawmah hian Prime Minister Narendra Modi leh Congress President Sonia Gandhi-te pawh an tel a ni.

Arun Jaitley-a dawta thu sawitu, Congress hruaitu Veerappa Moily chuan bill chungchanga an party-in sawiho an duh hrang hrangte a rawn sawichhuak a, anti-profiteering clause chu a hlauhawm hle niin a sawi. Moily chuan, “He bill hi thil thlak danglam hlawktu a ni lo a, hmalam panna kawng khat chauh a ni” tiin, sorkar laipui chu Rajya Sabha ngai pawimawh loah a puh bawk. “Upper house hi council of states a ni a, mahse bill pawimawh tak takte an sawiho ve thei lo a ni. Hei hi sorkar inrelbawlna palzutna a ni a, Rajya Sabha member-te chu banna thehlut vek turin ka ngen a ni” a ti.

Bill hi Lok Sabha-a pass a nih hnuah Rajya Sabha-ah thawn a ni ang a, mahse ‘money bill’ a nih avangin Rajya Sabha hian alo dang thei lo a, siam danglam tura a duhte a lo rawt thei chauh a ni. He rawtna hi Lok Sabha chuan a lo pawmsak emaw, a lo hnawlsak emaw thei a ni.

Congress party leh eptu party dangten bill-a thlak danglam duha rawtna an siamte chu vote lak a ni ang a, mahse eptute hi an tlem zawk avangin hnawlsak an nih rin a ni. Nimina bill sawihote hi Central GST bill, Integrated GST bill, Union Territories GST bill leh compensation law-te an ni. Hengte hi Parliament-in a pawmpui hunah, state GST bill hi state assembly-ah pharh an ni ve leh ang.