ED office-ah Rahul Gandhi a inlan

Congress party hruaitu Rahul Gandhi chu nimin khan National Herald money laundering case chungchangah thu zawhfiah turin Enforcement Directorate (ED) office-ah a inlan.

Rahul Gandhi a farnu, Congress general secretary Priyanka Gandhi Vadra-in a ṭawiawm a ni. Sonia Gandhi pawh he case kaihhnawihah tho hian ED chuan a ko a, mahse Covid-19 hri a kai avang leh, damdawi-ina dah luh a nih avangin June 23-a inlan turin tih a ni leh ta zawk a ni.

Congress party chuan ED office-a Rahul Gandhi koh a nih avang hian nimin khan BJP kaihhruai sorkar laipui laka lungawi lohna lantirin kawng an zawh. Delhi police-te chuan kawngzawhte danna tur an siam a, Congress party hruaitu ṭhenkhat chu hrengin bus-in police station lamah hruai an ni.

Delhi police hian Congress party-in lungawi lohna kawngzawh huaihawt an tumna khawpui chhungah buaina chawk chhuak thei leh, VVIP-te chet velna pawh tibuai thei nia sawiin phalna a pe duh lo a ni. Mahse hetichung hian nimin khan Congress party worker tam tham tak chuan nawrh hi an huaihawt a, Delhi khawpui bakah Madhya Pradesh, Assam, Maharashtra, Uttar Pradesh, Kerala leh state dang ṭhenkhatah lungawi lohna hi an lantir a ni.

Party hruaitu Randeep Singh Surjewala chuan Delhi khawpuia daidana siam chuan sorkarin an party a hlauhzia a tilang a ni tiin, Narendra Modi kaihhruai chu 'dawihzep' tiin a sawi.

Congress chuan PM Modi leh home minister Amit Shah-te chu eptu beihna atana central agency hmangah an puh. Central agency-in an party hruaitute an puhna chu thu dik lo leh belhchian dawl lo tiin, BJP chu politics phuba lak tuma hma laah an puh.

ED hian Congress thlawp, National Herald newspaper neitu, Young Indian Private Limited-a pawisa transfer danah thil dik tawk lo a awm niin a sawi. He newspaper hi Associated Journals Limited (AJL) in a tichhuak a ni.