Nupur Sharma-i'n hun pek belh dil

BJP spokesperson aṭanga suspend mek, Nupur Sharma chuan prophet Muhammad chungchanga a thusawi avanga Maharashtra-a Bihwandi police-in thu zawhfiah tura an koh chu hun pek belh turin a dil.

Nupur Sharma hi nimin khan police station-ah inlan tura tih a ni a, mahse hun pek belh tura a ngenna chu phalsak a nih avangin a inlan ta rih lo. Official-te chuan eng thleng nge hun pek belh a nih erawh an tarlang lo.

Thane-a Bhiwandi police hian Raza Academy-in TV debate-a prophet Muhammad chungchang mawi lo taka a sawi avangin Nupur Sharma lakah complaint an thehluh hnuah thubuai hi a siamsak a ni. Sharma bakah BJP aṭanga hnawhchhuah, Naveen Kumar Jindal pawh a twitter-a Prophet sawichhiatna lam a ziah avangin thubuai an siamsak bawk a, Jindal hi June 15-ah police station-a inlan tura koh a ni.

Mumbai police-te pawhin Sharma hi TV debate-a a thusawi chungchanga thu zawhfiah turin an ko bawk a, news channel hnenah hian debate video hi an dil bawk.

Nupur Sharma thusawi hian Muslim-te a ti thinur hle a, ram chhung hmun hrang hrangah buaina a chhuah phah a, lungawi lohna lantir pawh an la awm reng a ni. BJP pawh insawifiah nghalin, sakhaw inthliarna leh inhmuhhniamna chu an thlawp ngai lo tih a sawi a, June 5 khan Nupur Sharma chu BJP spokesperson a nihna atanga suspend-in, Delhi BJP media head Jindal chu an party aṭangin an hnawtchhuak bawk a ni.