US-in 26/11 pawikhawihna ruahmantu lu man puang

US chuan kum 12 liam ta, kum 2008 November 26-a firfiakten India rama Mumbai khawpui an beihnaa a ruahmantu ber nia puh, Laskhar-e-Tayyiba member Sajid Mir man a nih theihna atana a awmna chin hrilh theih hnenah lawmman, US dollar maktaduai nga a phal. 

US Rewards for Justice program chuan hemi chungchanga thuchhuah a siamah, "Pakistan-a hmunpui nei LeT firfiak pawla senior member, Sajid Mir hi November 2009-a Mumbai, India beih a nihnaa a inhnamhnawih avangin man tuma zawn mek a ni. Rewards for Justice programe chuan khawi ramah pawh ni se, Sajir Mir hi man emaw, thiam loh chantir emaw a nih theihna atana a chanchin hrilh thei hnenah lawmman, USD mtd nga a pe dawn a ni," a ti. 

26/11-a Pakistan firfiakten Mumbai khawpuia hmun hrang hrang an beihnaah hian mi 166 an thi a, pawikhawihtu firfiak pakua kahhlum niin pakhat, Ajmal Amir Kasab chu nungdama man a ni. Kasab hi thiam loh chantir a nih hnuah, kum 2012, November 11 khan Pune-a Yerwada Central Jail-ah khaihlum a ni. 

Mumbai khawpui beihnaah hian Sajir Mir hi operation manager niin, an beih tur hmun leh pawikhawihna thlen dan turte pawh a ruahman nia sawi a ni. Firfiatke hnenah an mi hrente chu that tur leh, kangmei chhuahtir tur tein a hrilh a, firfiak an man chhuah a nih theih dan turte pawh a ngaihtuah nia sawi a ni bawk. 

April 22, 2011 khan Mir arreast warrant hi tihchhuah a ni a, FBI chuan Most Wanted Terrorist List-ah a telh zui bawk.