UP-ah Mahakaushal Express rel chesual

Uttar Pradesh-a Supa khaw bulah nimin zing khan, Jabalpur-Nizamuddin inakara tlan Mahakaushal Express rel a chesual a, rel pindan paruk letin mi 36 in hliam an tuar a, an zinga 10-te chu an dinhmun a ṭha lo hle.

Rel chetsualna hmun hi Supa khaw bul, Mahoba leh Kulpahad rel station inkar a nih thu SP (Mahoba) Gaurav Singh chuan a sawi. Hliam na zualte hi Mahoba-a private hospital-ah dah nghal an ni.

Chief Minister Yogi Adityanath chuan, chetsualna a thlen thu hriat a nih veleh, Health Miniter Siddharth Nath Singh chu a hmuna kal nghal turin a tir a, dcotor 30 leh ambulance 21 tirh an ni bawk. Minister chuan rel chesuala hliam tuar na zualte chu UP sorkarin Rs 50,000 ṭheuh leh, hliam tenau tuarte chu Rs 25,000 ṭheuh a pek tur thu a puang.

Rel chesuala chuangte chhanchhuah hna hi member 47 awmna National Disaster Response Forece (NDRF) team chuan an thawk a ni. Chetsualna thleng vang hian rel 14 service a khaihlak phah a, rel pasarih service chu tihtawp lailawk a ni a, pasarih chu kawng dangah tlan tir an ni.

Railways ministry chuan chetsualna thlen dan hi chhui chiang turin thupek a tichhuak nghal. Rel kawng hi khawih dang­lam a nih vanga chetsual­na thleng nia report a awm a, rel pindan leh vang hian rel kawng meter 400 vela thui chu a chhia a ni.