India-in Shanghai Cooperation Organisation Summit a kaihruai dawn

India ram chuan Shanghai Cooperation Organisation-a full membership a nih hnua a vawi khatna atan vawiin hian Shanghai Cooperation Organisation Summit a kaihruai dawn.

Summit neih turah hian Russia, China, Kazakhstan, Kyrgyzstan, Tajikistan leh Uzbekistan Prime Minister-te an tel dawn niin Ministry of External Affairs (MEA) chuan a tarlang a, Pakistan aiawhin parliamentary secretary for foreign affairs a tel dawn thung.

India ram hi kum 2017 aṭang khan Shanghai Cooperation Organisation-ah hian member a ni chauh a, summit a kaihhruai vawi khatna tur hi hripui leng vangin virtual format-a neih tur a ni dawn. 

MEA-in a tarlan dan chuan Vice President Venkaiah Naidu-in SCO Council of Heads of Government meeting vawi 19-na hi a chair dawn a, SCO ramte insumdawn tawnna leh economic chu an agenda a ni ang. 

SCO ramte bakah hian Afgha­nistan, Belarus, Iran, leh Mongolia -te pawh an tel dawn bawk a, anni hi observer state niin an tel dawn a ni. Afghanistan aiawh hian an President a tel dawn a, Iran aiawhin Vice President, Belarus aiawhin Prime Minister leh Mongolia aiawhin Deputy Prime Minister-te an tel dawn.

Special guest atan Turk­me­ni­stan chu sawm niin an ram aiawhin cabinet of ministers deputy chairman a tel dawn a ni.