Sorkar laipui chuan Army, Navy leh Air Force-a sipai lak dan tur scheme a siam thar, 'Agnipath' chu nimin khan a tlangzarh. 
Agnipath scheme hi hlawh leh pension atana sum sen tam lutuk tihziaawmna turin short-term contractual basis lam hawia a siam a ni. 
Cabinet Committee on Security-in a pawm hnuah, defence minister Rajnath Singh chuan media briefing a neihah scheme thar hi a puang a, "Agnipath recruitment scheme-ah hian ṭhalaite sipaia an luh theihna turin ruahmanna thlak danglam a ni," a ti. 
Sipai lakluh dan ruahmanna thar, Agnipath scheme hnuaiah hian kum li chin thleng sipaia ṭan theihna te, a bak pawhsei zel theihnate a tel a, he scheme hmanga sipaia lutte chu 'Angiveer' tih an ni ang. 
Recruitment scheme hman meka short service commission hnuaiah sipai lutte hi kum 10 tal an thawh a ngai a, hei hi kum 14 thlengin pawhsei theih a ni bawk. 
Scheme thar hnuaiah sorkarin sipai hlawh leh pension hlawh atana a sum sen tam tak a hum phah thei dawn a ni. Heng atana sorkar sum sen hi a tam tawh hle. Kum 2022-23 atana defence budget, Rs vbc 5,25,165 aṭangin pension hlawh atan Rs vbc 1,19,696 a tel. Hei bakah hian sipaite hlawh leh an hmunhma enkawlna tur, revenue expenditure atan Rs vbc 2,33,000 dah a ni bawk a ni. 
Agnipath scheme hnuaiah ṭhalai kum 17.5-21 inkarte chu armed forces - Army, Navy leh Air Force-ah kum li an awm thei dawn a, kumin hian Agniveeer 46,000 lakluh tum a ni. Hlawh hi thla khatah Rs 30,000 - 40,000 a ni dawn a, sipaia an ṭan chhung hian on-contributory insurance siamsak an ni. Kum li an awm hnuah, Agniveer zinga 25% chu armed force-a regular cadre turin lak an ni ang a, kum 15 cvhhung an thawk thei dawn a ni. 
Angiveer-te chu sipai kum li ṭanga an chhuah dawnah, Neva Nidhi Package Rs nuai 11.71 pek an ni dawn a, Income Tax awltir an ni ang a, pension erawh an nei lo ang.