PM-in thla 18 chhungin post ruak hnawh khah nan Thawktu nuai 10 la turin a hrilh

Prime minister Narendra Modi chuan central sorkar-a department leh ministry hrang hrangte chu thla 18 chhunga thawktu nuai 10 la thar turin a hrilh.

Prime Minister Office chuan hemi chungchang hi twitter-ah tarlangin, "PM Modi chuan department leh ministry hrang hranga Human Resources status thlirin, kum khat leh a chanve chhungin mission mode-in thawktu nuai 10 la turin a hrilh a ni," a ti.

Ram chhungah hnathawh nei lo, employment rate sang zel avangin eptute chuan PM Modi kaihhruai BJP sorkar hi an sawisel fo a, department hrang hrangah hna ruak hnawh khah loin tam tak a awm mek tih an sawi.

PM hian thla hnih chuang liam taah khan central sorkara secretary-te chu ministry leh deparmtent hrang hranga hna ruak hnawh khah loh awmte hnawhkhat tura hma la turin alo hrilh tawh a ni. April 2-a secretary-te meeting a neihpui ṭumah pawh, public leh private sector-a thawktu chungchang chu sorkarin a ngaihven a ṭul thu a sawi.

Kumin March 1 thleng khan central sorkar hnuaia department hrang hrangah hnaruak hnawh khah loh nuai 8.72 a awm. Ministry leh department lian - Posts, Defence (Civil), Railways leh Revenue-ahte post ruak hi a tam zual a ni. Railways Ministry bikah hian post ruak nuai 2.3 vel a awm nia sawi a ni.