A ni 2-na atan ED-in Rahul Gandhi thu zawhfiah leh

Enforcement Direc­torate (ED) chuan National Herald newspaper kaihhnawiha money laundering case-ah Congress party president hlui, Rahul Gandhi chu a ni hnihna atan nimin khan thu an zawtfiah zui leh.

Thawhṭanni khan Rahul Gandhi hi Delhi-a ED office-ah a inlan tawh a, nimin chawhma dar 11:30 khan thu zawhfiah zui leh a ni. Nimina ED office a kalnaah hian a farnu, Congress general secretary Priyanka Gandhi Vadra chuan a ṭawimawm leh a, party senior leader eng emaw zatin an kalpui bawk.

ED-in thu zawhfiah tura Rahul Gandhi an koh chungchangah Congress party worker-te chuan Thawhṭanni bakah nimin khan lungawi lohna lantirin kawng an zawh leh. BJP kaihhruai sorkar laipui chu politics lama an khingpuite beihna atana dik lo taka central agency-te hmangah an puh a ni. BJP sorkar chuan agency hi 'election management department' atan a hmang nia sawiin, politics kaihhnawih thilah case 5,000 chuang zet an thehlut a, mahse an case thehluhte hian BJP an zawm chuan an thubuai neihte hi a bo nghal zel niin a sawi.

Thawhṭanni khan Rahul Gandhi hi darkar 10 chuang zawhna zawh a ni a, zawhna 25 chuang zawh a ni. Zawhna chhannate hi paper-in anmahni ngei ziahtir an ni. Gandhi hi zawhna khirhkhan tak tak, China rawn luh chungchang, ram chhunga thil man sang, hripui leng do hna kalpui dan, lockdown laia inhlawhfate harsatna tawh, loneitute nawrh huaihawt chungchangte zawh tel a nih thu Congress senior leader Randeep Signh Surjewala chuan a sawi a ni.