Odisha-ah Naxal helhoin railway station bei

Odisha, Rayagada district-a Daisally railway station chu Ningani zan khan Naxel hel 20 velin an bei.

Rel station beihnaah hian thi leh hliam an awm lo a, mahse nimin khan he station paltlang rel pali service chu a khaihlak a, hmun hrang hrangah dintir an ni.

Naxal helho hian station master SK Parida chu pawtchhuakin, station compoundah bomb an tipuak a ni. Prida leh porter Gobind Hikaka-te chu hun rei vak lo helho hian an hreng a, mahse a hnuah an chhuah leh nghal a ni.

Helho hian station master kut aṭangin walkie-talkie an laksak a, station pawna bungraw phur rel dinga thawktute chu khawl tithi turin an tilui bawk. Naxal-te hian April 15-16-a Bharatiya Janata Party national convention an thlen tur denchhena Prime Minister Narendra Modi-a’n an state tlawh a tum chu an dodal a, an duh lohna lantirin poster-te pawh an tar nghal a ni.

Naxal-te’n poster an tarah hian PM Modi-a’n Odisha state tlawh a tum chu an duh lo tih sawiin, PM chu tualchhung buaina chawk chhuaktu leh sumdawng nia puhin, Odisha a tlawh tur te, Odisha-a BJP national convention awm turte chu an dodal thu an tarlang.

Director General of Police KB Singh chuan CRPF leh Special Operaton Group (SOG) mi leh saten helho hi man tumin beihpui an thlak nghal tih a sawi.

April 15-16 a Bhubanewsar-a BJP national convention neih tur hi PM hian a telpui dawn a, BJP president Amit Shah bakah party hruaitu hlunte leh, BJP chief minister-te an tel dawn bawk a ni.