Noida-a African zirlaiten lungawi lohna lantir

Noida International University (NIU)-a African zirlai pali chu chi in­thliarna lam hawia kutthlak an nih avangin, African zirlai dangten lungawi lohna lantirin class an kal chhunzawm duh lo.

Hetih lai hian zirlai pakhat, Manish Khari rubo leh thata puh Nigierian zirlai panga chu campus-ah tun thlengin hmuh tur an la awm lo. Kum 16 mi, Manish hi kar kalta Inrinni zan khan drug overdose vangin a thi a, an ruang hi an in bulah hmuh a ni. 

Manish-a chhungte chuan Manish-a hi Nigerian zirlai panga-te chuan ruboin ruihhlo an pe niin an sawi a, police-ah complaint an thehlut. Heng zirlai pangate hi man nghal a ni a, mahse an puhnaah hian finfiahna tur a awm loh avangin chhuah leh nghal an ni.

Nigerian zirlaite chuan, Manish-a thih hnu hian tualchhung mi inpunkhawm te chuan March 24 khan an chennaah an luhkhung niin an sawi a, finfiahna engmah awm lo chunga man an ni tih an sawi bawk.

NIU-ah hian African zirlai 1,000 vel an awm a, mahse Manish-a thih dan chungchanga buaina a awm hnu hian an zinga a tam zawk chuan class an kal chhunzawm ngam lo nia sawi a ni.