Gujarat-ah bawng talhtu damchhung tantir theih

Gujarat-a BJP sorkar chuan nimin khan bawng humhalhna dan khauh zawk siamin, bawng talhnaa inhnamhnawihte chu damchhung tantir theih an ni dawn tih a sawi.

State chief minister-a Narendra Modi a awm lai, kum 2011 khan Gujarat sorkar hian Guarjat Animal Preservation Act of 1954 siamṭhain, an state chhungah bawng talh, tawlh leh bawngsa zawrh khap burna dan a lo siam tawh a ni, he thila inhnamhnawihte chu kum sarih thleng tan tir theih an ni. Mahse an dan hman mek hi nimin khan a aia khauh zawkin an siamṭha leh a ni.

Nimina dan siamṭhat hnuaiah hian bawng talhnaa inhnamhnawihte chu damchhugn tantir theih an nih bakah, cheng nuai khat thleng chawi tir theih an ni dawn a, bawng phurhna atana motor hman chu laksak theih an ni bawk ang. Bawng talh leh tawlhnaa inhnamhnawiha mante hi bail theih loh tura tih an ni bawk.

Chief Minister Vijay Rupani chuan Supreme Court-ah pawh Gujarat-a bawng humhalhna dan siam a nih theihnan theihtawpin an bei tih a sawi a, an dan neih mek chu khauh zawka siam an duh a, he bill hi assembly budget session neih mekah an pharh dawn tih a sawi.